An’n Sünnavend, den 26. Juni hebbt sik op den Möllner Stadthauptmannshoff bummelig 30 Lüüd drapen to’n Vörlesen un Tolustern. Ölvm Schrieverslüüd ut ganz Noorddüütschland sünd kamen un hebbt ehr Geschichten un Gedichten vörleest. Vunwegen Corona kunnen nich mehr as 20 Besökers dortokamen. Twors hett de Veranstalten ünner frie’en Himmel stattfunnen. Man ok wenn du buten büst, musst du di jo an de Afstandregeln hollen. Un so seten wi bi feinstet Wedder op de Wisch direktemang an’n Schoolsee, över den so’n suutje Bries hengahn dee. Un wi hebbt tohöört. Toeerst weer dor mal dat Platt-Pop-Duo „Tüdelband“ ut Hamborg. Mire Buthmann un Malte Müller harrn Gero Beckmann to Hölp. De is Theaterwetenschapler, Autor un Regieseur. Tohoop hebbt se ehr Höörspeel „AHAB“ vörstellt. An düt Riesenprojekt hebbt de dree fief Johr lang arbeidt. Un as dat 2020 endlich fardig weer, sünd se dormit merrn mang in de Corona-Maleschen rinkamen. Sodennig harr de 15. Autorendag in Mölln en echte Live-Weltpremiere. In AHAB geiht dat üm de harde Existenz vun den Malocher un Taxifohrer Carl Gustav Wagner-Rabotnik. „Pech in’t Speel un keen Glück in de Leevde“, kunn een sien Levensmotto tosamenfaten. Man ok töverhaftige Mächte mischt düchtig mit. De Seegeister kaamt de Elv hooch. Se hebbt gewaltig de Nees vull vun den ganzen Schiet, den se vun de Minschen op den Kopp smeten kriegt. Twüschendörch gifft dat Songs vun de Tüdelband, de extra dorför Musikstücken schreven hett. Rinhören lohnt sik op jeden Fall.
Statts en Vördrag över lebennig Museumspädagogik hett de Leiter vun’t Stadtmuseum in Wedel Holger Junker foorts sülvst richtig loosleggt. Blots mit Füersteen un Schilfblöten hett he en Füer in Gang kregen, jüst so as in de Steentiet. Un dat hett slumpt.
So as in all Johren hett dat en bunte Reeg ganz verscheden Slag Texten geven. Prosa un Lyrik, mit heel un deel egen Charakter.
Besünners anröhren weer en Lyrik-Dialog, den Marlou Lessing sik mit ehr Fründin Hannelore Hinz schreven hett. To jewiels een Thema hebbt de beiden Schrieversfruuns Gedichten schreven. Hannelore Hinz hett twüschentiets Demenz kregen. Un ehr Gedichten hebbt sik sodennig verännert. Sünd jümmers weniger worrn. Un toletzt ganz utbleven.
Sodennig is en schöne, rieke Dag in Mölln över’t Lesen, Tolustern un Snacken överhengahn.
Wi freut uns op’t tokamen Johr.
Wenn een de Texten nalesen will, geiht dat hier: https://www.niederdeutschzentrum.de/autorendrepen-2021/
Plattdüütsch Theateropföhren an de Grundschool in Zarpen
Autorendrepen 2021 - Texten sünd online
