25 Johren is dat nu her, dat de Nedderdüütschzentren in Sleswig un Holsteen grünnt worrn sünd – Grund noog, ene Jubiläumsfier in’n Lanneshuus an’n 4. September uttorichten. Up düsse Fier hebbt nich blot de Präsident vun den Sleswig-Holsteenschen Landdag, Klaus Schlie, un de Minderheitenbeopdragte Johannes Callsen gralert, ok Utsnidden ut de Kulturarbeit vun de Zentren weern antokieken.

Klaus Schlie begröt op Platt. (Bild: Landtag, Yvonne Windel)

Johannes Callsen graleert. (Bild: Landtag, Yvonne Windel)

De „Jungen Lüüd ut Löwenstedt“ hebbt en Sketchfüürwark upföhrt, dat Probleme bi’n Arztbesöök as ok Woortspelen mit Alkoholsorten oder den Ünnerscheed vun Hunde- un Minschenschiet umfassen dee. LPP 143, de ok bi den plattdüütschen Songcontest „Plattbeats“ dorbi weer, hett mit siene Hip-Hop-Beats de moderne plattdüütsche Musik repräsenteert. Sogor enen Text vun Klaus Groth hett he vertont. To Theater un Musik gesell Jan Ladiges  mit siene Poetry-Slam-Texten noch dat sprakene Woort.

LPP 143 hett egene Texten, man ok „De Slacht bi Hemmingstedt“ vun Klaus Groth rappt. (Bild: Landtag, Yvonne Windel)

Wo dat vör 25 Johren allens anfungen hett mit de Plattdüütschzentren in Leck un Ratzborg (nu Mölln) kunn en in de Snackrunn lernen, de Gesa Retzlaff ut Leck un Thorsten Börnsen ut Mölln modereren deen. Do fragen se Volker Holm, den ehemaligen Baas vun’t Holsteener Zentrum, un Günter Fleskes un Ingwer Oldsen ut Leck, wo dat domals allens anfung, wat de Zentren in de 25 Johren so allens maakt hebbt, wat noch to doon is un wat se sik för de Tokunft wünscht.

Günter Fleskes, Gesa Retzlaff, Thorsten Börnsen, Volker Holm un Ingwer Oldsen bi de Snackrunn (Bild: Landtag, Yvonne Windel)

Na Utblicke in Vergangenhet, Gegenwart un Tokunft kemen all noch de Eten un Drinken tosamen un kunnen sik uttuschen över de gelungenen annerthalf Fierstunnen in’n Lanneshuus.