Autorendrepen 2021

An’n Sünnavend, den 26. Juni hebbt sik op den Möllner Stadthauptmannshoff bummelig 30 Lüüd drapen to’n Vörlesen un Tolustern. Ölvm Schrieverslüüd ut ganz Noorddüütschland sünd kamen un hebbt ehr Geschichten un Gedichten vörleest. Vunwegen Corona kunnen nich mehr as 20 Besökers dortokamen. Twors hett de Veranstalten ünner frie’en Himmel stattfunnen. Man ok wenn du buten büst, musst du di jo an de Afstandregeln hollen. Un so seten wi bi feinstet Wedder op de Wisch direktemang an’n Schoolsee, över den so’n suutje Bries hengahn dee. Un wi hebbt tohöört.

Toeerst weer dor mal dat Platt-Pop-Duo „Tüdelband“ ut Hamborg. Mire Buthmann un Malte Müller harrn Gero Beckmann to Hölp. De is Theaterwetenschapler, Autor un Regieseur. Tohoop hebbt se ehr Höörspeel „AHAB“ vörstellt. An düt Riesenprojekt hebbt de dree fief Johr lang arbeidt. Un as dat 2020 endlich fardig weer, sünd se dormit merrn mang in de Corona-Maleschen rinkamen. Sodennig harr de 15. Autorendag in Mölln en echte Live-Weltpremiere. In AHAB geiht dat üm de harde Existenz vun den Malocher un Taxifohrer Carl Gustav Wagner-Rabotnik. „Pech in’t Speel un keen Glück in de Leevde“, kunn een sien Levensmotto tosamenfaten. Man ok töverhaftige Mächte mischt düchtig mit. De Seegeister kaamt de Elv hooch. Se hebbt gewaltig de Nees vull vun den ganzen Schiet, den se vun de Minschen op den Kopp smeten kriegt. Twüschendörch gifft dat Songs vun de Tüdelband, de extra dorför Musikstücken schreven hett. Rinhören lohnt sik op jeden Fall.

Statts en Vördrag över lebennig Museumspädagogik hett de Leiter vun’t Stadtmuseum in Wedel Holger Junker foorts sülvst richtig loosleggt. Blots mit Füersteen un Schilfblöten hett he en Füer in Gang kregen, jüst so as in de Steentiet. Un dat hett slumpt.

So as in all Johren hett dat en bunte Reeg ganz verscheden Slag Texten geven. Prosa un Lyrik, mit heel un deel egen Charakter.
Besünners anröhren weer en Lyrik-Dialog, den Marlou Lessing sik mit ehr Fründin Hannelore Hinz schreven hett. To jewiels een Thema hebbt de beiden Schrieversfruuns Gedichten schreven. Hannelore Hinz hett twüschentiets Demenz kregen. Un ehr Gedichten hebbt sik sodennig verännert. Sünd jümmers weniger worrn. Un toletzt ganz utbleven.

Sodennig is en schöne, rieke Dag in Mölln över’t Lesen, Tolustern un Snacken överhengahn.
Wi freut uns op’t tokamen Johr.

De Texten

Hier könnt ji/Se de Texten vun uns Schrieverslüüd nalesen. Veel Vergnögen bi de Lektüre wünscht dat Nedderdüütschzentrum Holsteen!

Jens-Peter Bey
Jens-Peter Bey Mutantenstadl
Foto: Andrea Funk
Marianne Ehlers
Marianne Ehlers Hochtiet 1921 & Hochtiet 2021
Foto: Andrea Funk
Petra Jessen
Petra Jessen An de Alster
Foto: Andrea Funk
Heiko Gauert
Heiko Gauert Bekannte un Verwandte & De Hoochdüütsch-Kurs & Ingelsch
Foto: Andrea Funk
Marlou Lessing
Marlou Lessing Hannelore Hinz und Marlou Lessing – Letzte gemeensame Themengedichten
Foto: Andrea Funk
Peter Schütt
Peter Schütt Dat Osterwunner ut de Moorschool & Mit Fasia op den Elfdamper no Stodersand & Tratsch int Treppenhus
Foto: Andrea Funk
Ingrid Straumer
Ingrid StraumerKinner un Deerten & De Zoo & Mammut wunnert sik
Foto: Andrea Funk
Heiko Thomsen
Heiko ThomsenSchoolmeester Bloom kann nich slapen
Foto: Andrea Funk
Christl Twenhöfel
Christl Twenhöfel Een Minsch 20-21 & Warms un Licht & Weggahn
Foto: Andrea Funk
Nach oben