Meist 25 Johr is dat her, dat de Düütsche Bunnesdag – dormals noch in Bonn – över diskereert hett. An düssen Dünnersdag, den 02. März, af Klock twee is dat nu wedder sowiet. De Bunnesdag diskereert dorbi över över Regionaal- un Minnerheitenspraken. Achtergrund dorför is De Sprakencharta för Regionaal- un Minnerheitenspraken, de siet 1999 in Kraft is un ok Plattdüütschen schützen schall. Dat Besünnere bi düsse Debatte is, dat – jüst so as dormals – nich blots över, sünnern ok op Platt snackt warrt. Mit vun den Partie sünd ut Sleswig-Holsteen de FDP-Politikerin Gyde Jensen ut Kiel un de Flensborger SSW-Mann Stefan Seidler.
De Kolumne to’t Thema:
Platt in’n Bunnesdag
Dat weren heel besünner Töön, de verleden Dünnersdag in’n Bunnesdag anslagen worrn sünd. Diskereert worr op Plattdüütsch. Dat hung tosamen mit de Charta för de Regionaal- un Minnerheitenspraken. De warrt nu 25 Johr oolt.
Twoors kunnen nich all mithollen un -maken, en poor Politikers weren dormang, de keen Plattdüütsch oder een vun de Minnerheitenspraken, üm de dat gahn is, snacken kunnen. Man en ganze Reeg hebbt dat henkregen. Een dorvun weer Johann Saathoff (SPD) ut Krummhörn. Dat is intwüschen en plattdüütschen Polit-Promi worrn. 2018 hett he in’n Bunnesdag op de Föddern vun de AFD, Hoochdüütsch schall as Lannesspraak in de Verfaten fastschreven warrn, mit en Reed antert. Un de hett he deelwies ok op Platt hollen. He hett – dütmal heel un deel op Oostfreesch – mehr Schutz un Ünnerstütten för de lütten Spraken inföddert. Gyde Jensen (FDP) ut Noordfreesland hett dorop henwiest, dat de Spraak mehr is as en beten Noordsee-Folklore mang Fischbröötchen un Möwen. Se mutt ok eernstnahmen warrn. Linda Heitmann (Gröne) hett de Verhältnisse bi uns mit de in Irland vergleken. Dorbi is ehr opfullen, dat in Plattdüütschland noch düchtig Luft na baven is. In Scholen, op’t Amt, in’n Stratenverkehr un in de Medien is Gälisch in Irland en Sülvstverständlichkeit. Dor warrt gor keen grote Bohei vun maakt. Dat wünscht se sik ok för Nedderdüütsch. Dat weer en schöne Bispeel dorför, dat een sik för de Spraak insetten un en feine Reed in ehr hollen kann, ok, wenn een se nich mit de Modermelk insagen hett. Dat geiht ok anners: Götz Frömming (AFD) sää, liekers de “Karnevalsstimmung auf einem Höhepunkt ist”, wull he sik dat Thema eernsthaftig un op Hoochdüütsch annehmen. Wölken dinken leider jümmers noch, dat mit Platt blots Karneval geiht. Schaad egentlich.
