Christiane Johannsen is ni’e Kreisfackberaderin

Noch nich lang her, dor hebbt wi Ingrid Bindzus as Fackberadersche för Nedderdüütsch in’n Kreis Herzogtum Lauenburg verafscheedt. Een Ära is to Enn gahn. En anner fangt an. Denn nu hebbt wi en ni’e kregen, un dat is Christiane Johannsen ut Swattenbeek. Se arbeidt siet 2000 as Schoolmeestersche an de Modellschool in Müssen. Un ünnerricht dor veer Johrgänge Jungs un Deerns in Plattdüütsch. En Fru vun’t Fack, de weet, wovun se snacken deit.  Man ok mang de Platt-Aktiven in’n Kreis is se keen ni’et Gesicht. Siet Johren al maakt se mit bi den Biraat Nedderdüütsch bi de Stiften Herzogtum Lauenburg. Sodennig weer se bi de Autorendaag op den Stadthauptmannshoff in Mölln mit vun de Partie un hett plattdüütsch Veranstalten mit plaant. Bloot leckt in Saken Plattdüütsch hett se bi ehr Grootöllern op Eiderstedt. Dor hett se de Spraak höört un goot funnen. Man in de School un in’t Studium is ehr Plattdüütsch nich bemöt. Aver as se 1998 vun Hamborg na Swattenbeek trucken is, güng dat ok loos mit dat sülvst Snacken. Un twoors bi Plattdüütschkursen, de se an de VHS maakt hett. Bavento keem noch de Wiederbillen “Platt för de Lütten” in Leck. Gelegenheit to’n Anwennen geev dat al vörher, man siet 2015/16 höört ok de Grundschool in Müsse mit to de 42 Modellscholen, de faste Stünnen in de Week hebbt för den Spraakünnerricht. Ik frei mi ordig, dat wi mit Christiane Johannsen nu en Lehrerin hebbt, de düchtig achteran is, dat dat mit de Spraak wiedergahn deit un mit Swung dorbi is. Veel Erfolg op den ni’en Posten! Tofaten kriegen kann een ehr ünner: christiane.johannsen@iqsh.de

75 Johr Sleswig-Holsteen op Slott Gottorp
Un de Emmi 2021 geiht an
Nach oben