„Friedag Nacht“ – Premiere vun dat Jugendtheaterprojekt vun de NDB Niemünster

Bi de Nedderdüütsche Bühne in Niemünster – Speeloort is de Hans-Böckler-School in Niemünster – geiht dat rasant to op de Bühne. Junge Lüüd in’t beste Teenageröller speelt en Stück, bi dat dat üm synthetische Drogen geiht, üm Alkohol, Mobbing un eerste Leevde. Egentlich nich de Saken, mit de du bit plattdüütsche Theater toeerst reken deist: Dat geiht üm fief junge Lüüd – een dorvun is jüst eerst frisch hentrucken, is alleen un kennt noch keeneen. De annern veer sünd en Klicke, de al länger tosamen runhangen doot, aver nix so richtig mit sik antofangen weet. Un dat allens in en Stadt, in de nix loos is. Ton Glück hett de öllste Jung en Auto. Gefährlich blots, dat he mit Drogen nich üm kann. Un na groot Shoppingtöörn bin lokalen Dealer geiht dat denn loos nan Technoclub in de Naverstadt, Friedag Nacht… . De Regisseur Stephan Greve hett in man blots twee Weken dat Stück, wat he sülvst schreven hett, mit de Jugendlichen inöövt. Un wat de dorut maakt hebbt, maakt Indruck. Authentisch speelt se de Charaktere un stellt Konflikte vör, mit de Lüüd in ehr Öller to doon kriegt. Wunnerbor klappt hett dat mit de Spraak. Keen vun de Schauspeler hett vör de Proven Plattdüütsch kunnt. Dat hett sik in jüst twee Weken gründlich ännert! Hartlichen Glückwunsch an all de, de bi dat Projekt mit vun de Partie sünd. De negsten Vörstellungen sünd an’n SA 14.09. 19 Uhr und SO 15.09. 16 Uhr im Studio-Theater der NBN, Kartenpreise: Schüler 3,- €, Erwachsene 5,- €

De jungen Schauspeelers ut Niemönster

Erlass vun't Bildungsministerium to „Nedderdüütsch in de School“
25 Johren Nedderdüütschzentren – Jubiläumsfier in'n Lanneshuus
Nach oben