(PM) Plattdeutsches Radio den ganzen Tag die ganze Woche – klingt unglaublich! Aber warum eigentlich? Andere Kleine Sprachen in Europa machen vor, wie es geht, und mit der Kampagne „Funklock stoppen!“ setzen sich Niederdeutschsekretariat/ Bundesrat für Niederdeutsch und der Schleswig-Holsteinische Heimatbund dafür ein, dass endlich auch die Sprache Norddeutschlands zu ihrem Recht kommt. Auf einer Acht-Länder-Konferenz hat sich der wachsende Unterstützerkreis nun auf ein gemeinsames Ziel geeinigt.

„Drömen lehren – So schall uns Programm utsehn“ – Dat weer een vun de Themen, de Vertreders vun plattdüütsche Organisatschonen ut acht Bunnslänner kort vör Oostern bi en Onlinekonferenz besnackt hebbt. Nödigt harrn Nedderdüütschsekretariat/Bundesraat för Nedderdüütsch un de Sleswig-Holsteensche Heimatbund. Dat Drepen güng los mit Programm-Bispelen vun anner lütte Spraken in Europa: Waliser, Sami, Soorben, Westfresen.

An´t Enn vun de Konferenz kunnen sik de 31 Delegeerten denn op en meensam Fohrplaan för en plattdüütsch Programm verstännigen:

„Wi nehmt uns anner Lütte-Spraken-Senners in Europa to´n Vörbild un föddert en öffentlichrechtlich Medium, wat 24 Stünnen an´n Dag söven Daag de Week en plattdüütsch Höörfunk-Programm mit Online-Anbott un hen un wenn mal en Filmbidrag produzeert. […] Dat Medium bruukt de plattdüütsche Spraak as dääglich Warktüüch un verplicht sik dorbi to Qualitäätsstandards, de in anner düütsche Programmen för de hoochdüütsche Spraak gellt.“

Bet nu warrt de Kampagne „Funklock stoppen!“ dragen vun de Heimatbünn in Neddersassen, Meckelnborg-Vörpommern un Sleswig-Holsteen. Ok de Plattdüütschen Rööd in Sleswig-Holsteen un Hamborg sünd dorbi jüst so as de Bundesraat för Nedderdüütsch. Op de Konferenz nee dortokamen sünd as Ünnerstütter to´n Bispeel de Vereen för Nedderdüütsch in Brannenborg, de Emsländsche Landschop un de Plattdüütschen Zentren för Holsteen un Sleswig. Ok PLATTNET.de maakt mit. Anner Organisatschonen mööt dat Papeer bi sik noch vun Liddmaten un Vörstännen bekräftigen laten.

Christiane Ehlers vun dat Nedderdüütschsekretariat un Jan Graf vun den Sleswig-Holsteenschen Heimatbund sünd heel tofreden mit de Resonanz. „Wi hebbt en rechtfardig Anliggen, wi warrt ümmer mehr, un uns Stimm warrt höört warrn“, so de Organisatoren vun de Konferenz.

De hele Text vun dat meensam Maal is nu to finnen op de Sieden vun den Sleswig-Holsteenschen Heimatbund un dat Nedderdüütschsekretariat ünner de Överschrift „Funklock stoppen!“, man ok hier in de PDF-Anlaag.