Geiht Rappen ok op Plattdüütsch? – Rap-Workshop an Meldörper School

An’n 18. un 19. März hebbt negen junge Lüüd vun de Gemeenschapsschool in Meldörp en Rap maakt. As Projekt vun’t Nedderdüütschzentrum för Holsteen un den Offenen Kanal Westküste in Heid un tohoop mit LPP 143, en plattdüütschen Rapper ut Kiel Gaarden, güng dat an de Arbeit. Rutkamen is en Weltpremiere, de wohrschienlich eerste plattdüütsche Gangsterrap överhaupt.

Fotos: Guballa / OK Westküste

Maximilian, Julius, Laila, Mattis, Hanna, Marcel un Joris heet de Nawuss-Rappers ut Meldörp un ümto. Un ehr Story hett dat in sik: De beiden Gangsters Harald un Peter sünd in en Huus instegen. Se hebbt de Schandarms dicht op de Hackens. Peter hebbt se ok al bi de Büx kregen. Harald hett sik op den Dackbodden mang Kartons vergraven. Man bi en halsbrekerische Aktschoon ut’ Finster rut neiht he ut. Kann he weglopen?
De Antwoort kriggst du eerst to weten, wenn dat Stück fardig is. Dat duert noch en lütt Wiel, denn dor mutt noch en beten an klütert warrn. Man denn kannst du di em in’t Programm vun den Offenen Kanal Westküst un op de Homepage vun’t Zentrum för Nedderdüütsch in Holsteen ok anhören. Ankieken kann een sik aver nu al mal de Billers ut de Textschmeed an de Gemeenschapsschool in Meldörp. Stütt kregen hett de Workshop vun de Kulturförderung vun’n Kring Dithmarschen.
Richtig veel Spaaß maakt hett dat all, de mit vun de Partie weren. Un en Barg Deelnehmers kribbelt dat all in de Fingers un maken den negsten Hit.

Fotos: Guballa / OK Westküste

Missingsch - en Film vun't Nedderdüütschzentrum över de Mischspraak twischen Hooch un Platt
Nee to'n Krieg!

Veranstaltungen

Wat gifft‘ Nie’es?

Nach oben