Helga Walsemann ehrt in Salem an’n 3.11.

An’n 03. November is in’t Gemeenschapshuus in Salem Helga Walsemann nochmal na all Regeln vun de Kunst verafscheedt worrn. De Leiter vun’t Zentrum weer mit en lüüt Anspraak dorbi. Al siet en poor Maanden hett Ingrid Bindzus de mehrsten Opgaven övernahmen. Man bi dat letzte Drapen vun’t Forum schull dat nu nochmal fierlich warrn. Kreispräsident Meinhard Füllner hett de lang List vun ehr Aktivitäten un Projekten butenkopps benöömt. Nich ganz eenfach, bi all dat, wat dor över de verleden 20 Johr tosamen keem. Loovwöör geev dat ok vun’n Amtmann vun’t Amt Lauenburgische Seen Heinz Dohrendorff un den Börgermeister vun Salem Herbert Schmidt.
Ünnen finnd sik nochmal de Kolumne ut de Loonorgsche Lanneszeitung vun’n 1. Juli.
Helga Walsemann
Dat is en Ära, de to Enn gahn is, bi de Kreisdagssitten verleden Dünnersdag. Helga Walsemann is as Plattdüütschbeopdragte vun den Kreis Hartogdoom Loonborg verafscheedt worrn. Sodennig hett se nu de 20 Johren op düssen Posten jüst vullmakt. 2002 hett ehr de Kreisdag dorto beropen. Twüschentiets is ordig wat in Gang kamen. An eerste Steed steiht dat Grünnen vun dat “Plattdüütsch-Forum”. Dorbinnen sitt de Plattdüütschbeopdragten ut all Ämter un Städte ut den Kreis. Un dormit is ehr en echte Coup glückt. Sowat hett dat vörher nämlich noch nich geven. Narms. Dat Forum is sodennig en Vörbild worrn för anner Regionen, Oostfreesland to’n Bispeel. De hebbt sik düt Format vun Loonborg afkeken. En ganzen Dutt vull Veranstalten sünd dor in’t Slepptau ok noch bi rutsuert: De Kinnernamiddaag, de regelmäßig veranstaltet warrt in dat Johr, in dat dat keen Leeswettstriet geven deit; plattdüütsch Lesen un Kunzerten in mennigeen Stadt un Gemeen in’n Kreis; Opföhren vun de ganz Lütten ut Kinnergoorns un Kitas. Man dat is lang nich allens, wat se anschaven hett. Sietdat se in dat Amt insett worrn is, hett se to jede Johrstiet en Flyer rutbröcht mit Informatschonen un Veranstalten, de denn anstahn doot. To’n tweten Mal in ehr Amtstiet gifft se nu en Bestandopnahm över all Plattdüütsch-Aktivitäten in’n Kreis rut. Wokeen dinkt, nu sett se sik woll heel un deel to Roh un leggt de Hannen in de Schoot, de kennt ehr slecht. Ok ut de twete Reeg rut blifft de Möllnerin ehr Hartenssaak verbunnen un warkt dor wieder an mit. Hartlichen Dank för dien feine Arbeit, leve Helga Walsemann!

NNO: Hool Dien Muul un sing mit! Jochen Wiegandt in Loonborg to Gast an'n 30.10.
Hans-Hermann Briese kriggt den Literaturpries vun de Stadt Kappeln an'n 04. November
Nach oben