Jürgen Müller – Dagdrömer & Bi dan’n Tähndokter

Jürgen Müller
Jürgen MüllerDagdrömer & Bi dan'n Tähndokter
„PLATT FÖR HÜÜT UN MORGEN“, NEDDERDÜÜTSCH AUTORENDREPEN 2022
Jürgen Müller

Dagdrömer

Maandagmorgen, de Week fangt an
Bet Freedagavend is dat lang
Dat Weekenenn is veel to kort
Annersrüm, dat wär doch wot
Upstahn, upstahn, röpt de Hahn
Wat schall dat hüüt bloots wiegergahn
In´n Halfschlap löppt in´n Baderuum
Raseern un waschen ahn Schuum
Un ok de Tähnböst, so gediegen
De will in´n Muul mi nich so schmiegen
Dat is doch de vun Dr. Best
De kriggt doch jümmers bloots us Gest
Ik denk mi noch un blief kort stahn
Wat schall dat hüüt bloots wiegergahn
De en un anner nu vun jau
Markt all, un kennt dat grad genau
Man kummt öft neven sik to stahn
Süss wür dat anners wiegergahn
Man löpt öft los un weet nich mehr
Wat wull ik hier, wo kaam ik her
Besinnst di wedder un löpst trügg
Nu weet ik wedder wat ik mügg
Kann ok passeern, dat´t leeger ward
So annersrüm, ik erkleer di dat
Weest wat du wull un wull dat ok
Un rögst di nich un löpst nich los
Du hörst die´n Nomen, man röpt di to
Dan´n kenn ik doch meenst du noch so
Du fraagst di wer du eegentlich büst
De, de du büst, or de du müggst
Du wullst doch ok mal anners sien
Ganz anners, mit so´n lüttjen Splien
Dat sünd so´n Dag, dat kannst mi glöven
De Doktor deiht all up di töven
He will di irgendwatt verschrieven
Ik ra´di aber, lat dat blieven
Son´n döreenanner in dien Kopp
So´n düselig beheebig Trott
Gedanken de nich mehr to griepen
Du hörst dat överall all piepen
Dat kummt vun usen hastig Tiet
Us Liefwark kummt dor nich mehr mit
Us Leeven is to Schnellstraat worn
Doch sünd we Minschen nich so born
Üm överhaupt noch to bestahn
Deihst du eenfach wiegergahn
Up de Schnellstraat vun us Leeven
Wo is bloots dat Leeven bleeven
Anschienend up de linken Fohrbahn
Wull du leeven, blief nich stahn
Links dor löpt dat ok so dull
Kannst du maken wat du wull
Schneller as dat Leeven sülvst
Irgendwann brukt se alle Hülp
Hebt sik sülver överhalt
Doch an´n End ward eerst betaalt
Man kann nich jümmers schneller leeven
Sülvst en Computer wür upgeeven
En Afgliek kummt hier good to pass
Denn bitt dat Ding ok nich in´n Gras
Rünnerlad´n, up Fastplatt överdreegen
Un alln´s let sik wedder good bewegen
Dat wär doch nu en fein Geschicht
Wür mi ok stahn good to Gesicht
De Fastplatt in mien Kopp hier baven
Jümmers wedder neet to laden
Denn har ik ok nich so ne Last
Schritt to hol´n mit düsse Hast
Un wär nich jümmers achteran
Dat fangt doch morgens all mierst an
Steihst up un wull di Fröhstück maken
Dorto en swatten Kaffee kaken
Kiekst up de Klock deihs di verjagen
De Klock de het all Middag slagen
Fröhstückt ward bloots noch in Amerika
De Erd de dreiht, dat is dat ja
Bet ik nu in Amerika bin
Is dor ok Middag, makt keen Sinn
Un denn is doch bi us all Avend
Wat mak ik nu, stell ik mi fraagend
Schall ik noch töven bet Klock acht
Ach watt, na´dn Bett nu Goode Nacht
Un denn wär dat doch nülich so
Musik lööp in dat Radio
Ik fohr mit´n Wagen up de Schnellstraat
Mien Fastplatt har woll jüst wat oplaad
Gedanken wär´n nich ganz bied´n anner
Düt Leed un dorto dat Gejammer
Hang down your Head Tom Dooley
Neem die´n Hoot af Tom Dooley
Un ok lieset Rauschen wär to hörn
Dat kann doch nich de Motor wähn
Dat rauscht doch sicher allgemeen
Dat Leeven rauscht jo ok so schön
Dat Leeven dat is doch en Hetzen
En Ilen, Fleegen, Hasten, Wetzen
En Jagen, Dröhnen, Klappern, Knarren
Wat is denn los mit düssen Karren
Hüüt weet ik dat beeter
Dat wär en Kolbenfreeter
To´n Schluss noch wat vun mien Kolleg
De har sik ok mol langsam rögt
En poor Kopien wull he sik maken
Nanu denk ik, is dat to faten
En Bünnel Schredder in sien Pooten
Verkehrten Apperat hinloopen
Ik hef ehm ers mol tröst un seggt
Mi güng dat ok mol teemlich sleggt
Ik wull mien Tüchnis eegentlich schreddern
Un har dat utverseehn kopiert
Nu wär ik mit mi dull an´n heddern
Denn nu hark´twee – hes dat kapiert

Bi dan´n Tähndokter

Ik mok mien Muul apen un will Tähn putzen – fallt mi dor över mien Backentähn en Eiterzist op. Toeerst dagg ik, dat kenn ik jo noch vun mien Visage, dat het woll mit mien verschleppte Pubertät to doon. Dat ward in en poor Daag verschwunn sien. Wür aver jümmers grötter. Good, heff ik daggt, kenn ik jo ok noch vun mien Visage: utdrücken. Wenn man eenen Pickel in Gesicht utdrückt, denn land´t de Inhalt jo tomeerst up´n Speegel. Sütt en bedden unaftietlich ut, lett sik aver kuum verhinnern. Wann mokt man dat am besten weg? Lieks? Denn smert dat aver so. Oder töövt man, bet dat en bedden andrögt is? En Eiterzist in Mund het nu in Betugg to dan´n Speegel enen grooden Vördeel. Dat verblifft in Mund. Man mutt nu bloots noch Slucken. Vun Smack her wür ik seggen – würzig. So en bedden na …. Fondor, düt drööge Würzpulver vun Maggi. Ik meen, wenn ik dor nu so över nadenk? Is jo ok geel. Maggi ward doch woll nich..? Ne, dat glööv ik nich. Aver veele Tosatzsstoffe fangt jo ok mit E an? Wat wull ik man noch vertelln? Ach jo, Eiterzist utdrücken.  Is aver jümmers wedderkamen. Ik eerstmal bi´n Tähndokter anropen.

Muul apen –  seggt de Tähndokter. Hmh, alln´s överkront, dor schient en Wöttel entzünd to sien. Dor mut ik mal dör de Goldkron in de Wöttel bohrn, alln´s en beeten utspölen un desinfizeern.  In 14 Daag is dat wohrschiens verheelt. En Sprütt bruukt we glööv ik nich, de Tähn de müss doot sien. Wenn nich, schüll ik mi bemarkbor maken.

Ik heff rasch markt, dat de Tähndokter mit sien Glooven in Unrecht is. Ik wull aver sien Fachkompetenz nich ünnergraven un heff mi nich bemarkbor makt. He het dat wunnerbor apenbohrt, noch mal nabohrt, mit Nadeln bet in de Wöttelspitzen utputzt, Desinfizeerung rinnsprütt un alln´s wedder sloten.

Na 14 Daag is dan´n Tähndokter wiss worn, dat de Entzündung noch dor is. Alln´s wedder mit Muul apen maken un so. He müss dat noch mal apenbohrn, aver en beeten grötter, un noch mal desinfizeern, aver en beeten duller. Letztmal har dat jo ok so wunnerbor klappt, ne Sprütt bruukt we woll wedder nich. Na denn man tau, heff ik bloots noch seggt. He het dat wedder apenbohrt, aver en beeten grötter. He het dat noch mal nabohrt, ok en beeten grötter. He het dat mit Nadeln bet in de Wöttelspitzen utputzt. Un he het dor wedder Desinfizeerung rinnsprütt, en beeten duller. Un denn het he alln´s wedder sloten un seggt, dat dat nu wiss beeter ward.

14 Daag löter, ik mak wedder mien Muul apen un will Tähn putzen – en Eiterzist an sülvigen Backentähn. Ik wedder na dan´n Tähndokter. Düttmal müss ik aver bloots mien Muul apenmaken. Dat hölpt nu alln´s nich het de Tähndokter meent, dor hölpt bloots en Wöttelschnitt, we bruukt en Termin bi`dn Kieferchirurgen.

Vun weegen Kieferchirurg, Kieferchirurgin, keen 30. Theoretisch weet de wohrschiens goot Bescheed, hef ik daggt. Toeerst het se mi ne Sprütt verpasst. Na kotte Tiet weu vun mien ünnerst Visage kuum wat to marken. So, un nu Muul apen maken, en grooten Sluck Desinfizeerung in´n Muul un Muul wedder tau maken. Dat alln´s nu een Minuut in´n Muul hin un her bewegen. De Kieferchirurgin geiht ruut ut dan´n Behandlungsruum. Wie sall ik mit alln´s taub in´n Gesicht Desinfizeerung een Minuut in´n Muul hin un her bewegen? Mi is bloots een Saak in´n Kopp kamen. Kopp hin un her schürn un dorbie versöken dat Muul nich apen to maken. Kopp hin un her schürn het goot klappt. Nu weet ik ok worümm de Kieferchirurgin dan´n Behandlungsruum verloten het. Na 20 Sekunn har ik vun dat Desinfizeerungstügg kuum noch wat in´n Muul. Ik müss noch twee Mal en düchtigen Sluck achteran kippen, üm de Minuut överhaupt vull to kreegen. At de Minuut vörbi weu, keum de Kieferchirurgin wedder in´n Behandlungsruum. „Wat sütt dat denn hier ut? So geiht dat nich! We mööt dan´n Behandlungsruum wesseln.“

Un nu güng alln´s ganz fix. Ik kreeg en OP-Doog över mien Kopp. Mit bloots son´n lüttjes Lock för de OP, het se seggt. Ik glööv aver, se künn mien Visage nich mehr bekieken. Dat het en poor Mal ruckelt un zuckelt, aver ik heff nix föhlt. Dat weu mehr so, at wenn us Naver Holt klöövt. Se hebt mi en Implantat verpasst un alln´s is wedder goot.

Bloots de Krankenversicherung het noch mal schreven. De wull´n noch wat över dat Schiermaken vun dan´n Behandlungsruum weeten. Vun Schiermaken wüss ik nix, heff ik trüggschreven, ik har dat desinfizeert.

Imagefilm

Missingsch-Film

Veranstaltungen

Nie’es

Nach oben