An’n 16. März gifft dat in’n Stadthauptmannshoff in Mölln en Kombinatschon to beleven, de dat nich graad jeden Dag gifft: Platt un Kunstgeschicht. De Kunsthistoriker Dr. Hans Thomas Carstensen höllt al siet vele Johr Vördrääg över Kunst. Mehrstendeels op Hooch, man af un to deit he dat ok op Plattdüütsch. Düt Mal is de spaansche Maler Franciso Goya (1746 – 1828) dat Thema. De hett uns in sien 82 Levensjohrn en grotet Wark torüchlaaten: Dor gifft dat wunnerbor bunte Rokoko-Billers, avers ook sien düsteren »Swatten Billers«. Düsse Veelfalt spegelt, wat för en beweegt Leven dat weer: Ünner den Indruck vun private un politisch Katastrophen is ut em en opmarksaam un sensible Beobachter vun sien Ümgeven worrn. So hett Goya uns nich blots de dramatischen Tostänn in’t Spanien vun sien Tied wiest, sünnern he föhrt uns ook jümmers sülms vör Ogen: de Minsch as sensibel Wesen un as willet Beest.
Veranstalten deit den Avend dat Zentrum för Nedderdüütsch op Initiative vun den Nedderdüütsch-Biraat vun de Stiften Hertogdom Lauenbor.
Bunnesdag diskereert an'n 02. März op Platt över Platt
NDB Niemünster warrt 100 Johr mit "De Fährkroog"
