Dat weer grote Kino an’n 12. September in Husum. De Filmregisseur Lars Jessen is kamen un hett sien ni’e Film “Mittagstunde” vörtostellt. Un twoors nich in Berlin oder tominnst in Hamborg. Nee, in’t Kinocenter Husum schull dat loosgahn. Nich blots he is anreist. In’t Slepptau harr he en ganzen Barg Lüüd ut dat Filmteam: Jüst vörweg Charly Hübner, de in den Film de Hauptrull Ingwer Feddersen grootordig spelen deit. Ok de Autorin Dörte Hansen weer mit vun de Partie. Bavento hett sik noch en ganzen Rutsch Press un Fernsehn üm dat Kino ansammelt. Sogor Mionisterpräsident Daniel Günther is anreist un kieken sik dat an. Un sodennig geev dat mit richtig Glamour in de Husumer Niestadt.
Mittagstagstunde – de Film
De Geschicht speelt in dat Dörp Brinkebüll jichtenswo in Noordfreesland, dat dat in Wirklichkeit gor nich geven deit. Oder överall, denn vele Dörpers sünd as Brinkebüll. Aver egens müsst du seggen “geven hett”. Denn dat verännert sik in’n Loop vun de Geschicht, de Dörte Hansen vertellen deit, gewaltig. Un ok dat gelt för so vele anner Dörpers jüst so. In de Mitt vun de 60er Johr geiht de Vertellen loos. En lütt Buerndörp, dat allens hett, en Kark, en Krog, en Bäcker un en lütt Laden. De Minschen, de dorbinnen leevt, kennt sik al siet jümmers. De Buern hebbt so wenig Köh, dat se all ehr Naams kennen doot. Un merrn mang is “Marret Ünnergang” in ehr Klapperlatschen ünnerwegens, de se to jede Johrestiet anhett. Se vertellt jeedeen, den se tofaten kriggt, wat vun den Weltünnergang, de dicht bevör steiht. Man nich blots Marret is wunnerlich. Se is dat blots besünners. Ok vele vun de annern Dörpslüüd sünd böös egen: De Dochter vun’n Bäcker, de den ganzen Dag blots lesen mag; de Paster, de nich glöövt, dat he in sien Gemeen noch een anner richtigen Christ hett; de Schoolmeister, de bi Wind un Wedder de Koppeln na Warktüüch ut de Steentiet nakieken deit. Dörte Hansen vertellt düsse Geschicht, de en goot Deel ok ehr egen Geschicht is, slicht un liekut. Ahn Kitsch un Fisimatenten. Un dorbi dröppt se de Atmosphär so akraat, dat du di meist dorbi verfeerst. Af den 12. September kümmt “Mittagstunde” nu as Film in de Kinos – ok mit en plattdüütsche Version. To’n Bispeel an’n 16.09., Klock söss (18:00) in’t Abaton Kino in Hamborg.
