Plattdüütsch is in de Welt vun de ni‘en Medien ankamen – dat gifft plattdüütsche Websieten, Facebookgruppen, Youtubetutorials. Man wat dat noch nich gifft, sünd plattdüütsche Dialog-Podcasts, in de över allens Möögliche snackt warrt, över dat een snacken kann, blot even op Platt. Dat Nedderdüütschzentrum Holsteen hett nu jüst so en Podcast opnahmen un in‘n Januar noch warrt dat em to hören geven. Un dormit ok Lüüd tolustert, de nich so goot Platt verstaht, gifft dat ok hochdüütsche Andeele. Man Platt is de Hauptsaak un Hauptspraak.

Thorsten Börnsen un Nikos Saul vertellt sik do nich blot, wat een bi Musikopnahmen in en hollandschen Vakantiepark beleven kann oder worüm in‘n November in Noorditalien Faröerisch, Katalanisch un Nedderdüütsch to hören weren, man ok vun Böökers, de se lest hebbt, un Filmen, de se sehn hebbt. Wenn dat so wiet is, dat dat to hören is, warrt dat noch mal en Hinwies op düsse Homepage geven.