NNO: Hool Dien Muul un sing mit! Jochen Wiegandt in Loonborg to Gast an’n 30.10.

“Hool Dien Muul un sing mit!”
In’ Tosamenhang mit dat lütt Kulturfestival NoordNoordOost vun den Heimatverband Mecklenburg-Vorpommern, den Lümborgschen Landschapsverband un dat Nedderdüütschzentrum in Holsteen harrn wi an’n 30.10. Jochen Wiegandt to Gast.
Woher kümmt egens “Dat du mien Leevsten büst”? Un wat för en Geschicht stickt egens dorachter? “Klopp an de Kamerdöör, faat an de Kling, Vader meent, Moder meent, dat deit de Wind”. Oder noch en beten düütlicher: “Kümmt denn de Morgenstünn, kreiht de ool Hahn, Leevster mien, Leevster mien, denn musst du gahn…” Wat hett dat nu op sik in uns plattdüütsche Nationalhymne? Höört sik so’n beten tweedüdig an.
De un anner Fragen harrn wi an’n Sünndagnamiddag in de goot besette Heinrich-Osterwold-Hall in Loonborg tofaten. Un Jochen Wiegandt hett uns mal en beten över sien Schuller kieken laten bi sien Arbeit: To’n Bispeel woans he wat rutfinnen deit över de Leders, de he denn achteran mit sien Publikum singen deit un de jeedeen kennt. Nu dinkt een sik, ‘de Wiegandt sitt vörwiss veel in Archiven un wöhlt in Paperen un Dokumenten’. Man tatsächlich kiekt he eerstmal bi Google to. As een dat hüüttodaags so maken deit. Un dor finnt he denn ok al en ganzen Barg Informatschonen. He, de ole Lederjäger un -sammler is twüschentiets al lang in’t 21 Johrhunnert ankamen. Un sodennig kriegt wi natürlich all wat mehr to weten. Dat weer en feine Namiddag, bi de wi veel Ni’es to weten kregen hebbt. Un natürlich fein tosamen sungen hebbt!

Plattdüütsch Thinktank an'n 22.10. in de Nedderdüütsche Bibliothek in Hamborg
Helga Walsemann ehrt in Salem an'n 3.11.

Veranstaltungen

Wat gifft‘ Nie’es?

Nach oben