NoordNoordOost – wi dreiht op!

LPP 143 (Foto: I. Seba-Eichert)

Dat weer schon en besünner Avend an‘n föfften November in de Lauenborger Osterwold-Hall. Den Opslag möök de Kieler Rapper LPP143. „Dirty Dalers“ hett glieks en ganze Reeg Bedüden: „Dörtig Dalers“ op Platt, dat „schietige Geld“ op Engelsch un denn weren dat jo ok 30 Silberlinge, för de Jesus vun Judas verraden worrn is.

Ok in‘t Programm vun düssen Avend weer de Rap-Version vun de Slacht bi Hemmingstedt vun Klaus Groth dorbi. Snell, mit Witz un Kritik geiht dat to bi LPP143. Man an düsse Klänge müss sik dat Publikum eerstmal wennen. Aver na dat se sik en beten ringroovt hebbt, is de plattdüütsche Hip-Hoper doch ok bi vele Tohörers lanndt. He is mit en ordigen Applaus vun de Bühn verafscheedt worrn.

Gesche Gloystein (Foto: I. Seba-Eichert)

Den längsten Weg harr an düssen Avend Gesche Gloystein. Se is ganz ut Meppen anreist. Ehr Publikum hett de junge Poetry-Slammerin foorts tofatenkregen. Ehr Texten sünd witzig, mennigmal ok trurig un faken kritisch. Man deepdinkern, klook un op de Hööchde vun de Tiet sünd se jümmers. Un sodennig hett dat langen Bifall för ehr geven.

Benjamin Nolze (Foto: I. Seba-Eichert)

Ut Meckelnborg is Benjamin Nolze kamen. He hett Traditschonellet jüst so as Leder vun sien Vader Kurt Nolze sungen. Twüschenbinnen geev dat noch Döntjes bavento.

Gesche Gloystein, Benjamin Nolze un LPP143 (Foto: I. Seba-Eichert)

Insgesamt weer dat en runnen Avend, de ganz verscheden Slag Texten un Musik tosamenbröcht hett. Un Inga Seba-Eichert vun‘n Lümborgschen Landschapsverband, Anne Boll vun‘n Heimatverband MV un de Leiter vun‘t Nedderdüütschzentrum för Holsteen Thorsten Börnsen weren sik eenig, dat schall wiedergahn mit de Tosamenarbeit. Also ok in‘t tokamen Johr dreiht wi wedder op bi „NoordNoordOost“!