Verleden Johr al hefft sik plattdüütsche Musikers un Leedschreevers ut Holland un Düütschland to en grenzöverschrieden Musikprojekt up’n Bungsbarg draapen un dat Leed „Ik will mehr“ produzeert. An’t Weekenenn vun’n 15. bit to’n 17. November geiht dat nu wieder, man düt Mal in Echten in’e Provinz Drenthe in Holland. Dorbi sünd teihn Lüüd, fief ut Düütschland un fief ut de Nedderlannen. Organiseert warrt dat allens vun de Stichting REUR ut Holland un dat Nedderdüütschzentrum för Holsteen. Blangen dat Opnehmen vun Single un Musikvideo steiht natürlich ok dat Kennenlehren in’n Middelpunkt, denn Plattdüütsch kann Lüüd över Lännergrenzen weg verbinnen. Wenn alles fardig is, warrt Leed un Video denn ok in Sleswig-Holsteen präsenteert.

Hier kann en sik noch mal dat Leed vun’n verleden Jahr anhören: https://www.youtube.com/watch?v=QdvIYWRfYuc