En poor Wöör över mi

Thorsten-BoernsenSiet 1. Januar 2016 hett Thorsten Börnsen dat Leit vun’t
Plattdüütschzentrum in Holsteen.

Boorn bün ik vör 46 Johren in Sleswig un opwussen nich wiet weg dorvun op Hooch- un Plattdüütsch. Na dat Abitur bün ik na Hamborg kamen, un heff dor Zivildeenst maakt. Bi’t Studeren bün ik över lütt Slenkers bi de Geschicht lannt, Religionswetenschap un „nedderdüütsche Spraak un Literatur“ weren mien Bifäkers. 2003 worr ik dormit as Magister fardig. Ünner annern heff ik denn as Museumspädagoog as Frieberoopler in de KZ-Gedenksteed Niengamm arbeidt.
Al as Student heff ik anfungen, mi Törns dörch Hamborg op Plattdüütsch uttoklamüstern un antobeden. Dorbi sünd denn verscheden Touren dörch Binnenstadt, Spiekerstadt un an de Waterkant lang rutsuert. Düsse Törns weren denn ok de Grundlaag för mien plattdüütsch Hamborgföhrer, de 2008 bi’n Boyens-Verlag in Heide rutkamen is. In’t sülvige Johr güng dat mit de nedderdüütschen Föhrungen dörch dat Hamborger Raathuus loos. Dorbi hett mi besünners reizt, ok Politik, Geschicht un Kunstgeschicht in de Regionaalspraak to verkloren.
Al lang funn ik dat wichtig, mehr Kulturanbotten för jung Lüüd antoschuven. Besünners wat de plattdüütsche Musikszene angüng, weer dor lant Tiet nich veel loos. 2011 geev dat denn de Mööglichkeit, tohoop mit de Landschapen un Landschapsverbännen in Neddersassen „Plattsounds“ op de Been to stellen. Dat is ´n Wettstriet för jung Musikers twüschen 15 un 30 Johr, de Lust hebbt, op Plattdüütsch Musik to maken. Wi hebbt dat dormit aver ok op Musikers afsehn, de anners man bloots op Düütsch oder Engelsch singen doot un gor keen Plattdüütsch künnt. De wüllt wi nieschierig maken op unse Spraak. Dorwegen kann een sik de Texten ok op Platt översetten laten. Middewiel gifft dat in Neddersassen över 80 Bands, de tominnst een plattdüütsch Leed in’t Repertoire hett.
Bi den Lümborgschen Landschapsverband, wat ´n Organisatschoon is, de regionaal Kultur in’t Rebeet vun de Lümborger Heid föddern deit, heff ik 2013 anfungen. De letzten twee Johren heff ik dor as Referent för Plattdüütsch warkt. To mien Opgaven hett dat tohöört, Nettwarken mang de Platt-Aktiven in Gang to bringen, man jüst so heff ik Leesstafetten un Schooltheaterfestivals op de Been stellt un den plattdüütsch Leeswettstriet mit organiseert.
Nu frei ik mi bannig op de nie’e Opgaav för Plattdüütsch in’n Lannesdeel Holsteen to warken.

Thorsten Börnsen

(Foto: Gerkens-Harmann)

(Foto: Gerkens-Harmann)

De Vörgänger Volker Holm weer al vun den Anfang vun’t Plattdüütschzentrum 1994 an dorbi. He hett dat Zentrum in Gang bröcht un soorg dorför, dat jeedeen jümmers Antwoort kreeg op sien Fragen. He harr dat Leit in’t Zentrum, möök de Verwalten un kümmer sik üm de Finanzen. Un ok nu in’n Rohstand hölpt he mit weertvull Tipps un goden Raat jümmers noch wieder, datt dat Plattdüütschzentrum lopen deit.
Mit de PLATTNET-Norichten soorgt he ok wiederhen dorför, dat Nieges ut de plattdüütsche Kulturwelt verbreed ward.