Plattdüütsche Weken in Stormarn gaht loos mit Jan Graf

Jan Graf hett den Opslag maakt bi de 21. Plattdüütschen Weken in Stormarn an’n 26.09. in’t Börgerhuus vun Bartheil (Bargteheide). Deepdinkern un lustige Geschichten hett de Singer-Songwriter ut Passade dorför mitbrücht un sien Leder natürlich.

De Leiter vun’t Nedderdüütschzentrum weer mit vun de Partie un hett to Begröten en Grootwoort hollen. Dat künnt ji hier finnen:
Gerd Spiekermann, Anni Heger, Gerrit Hoss, Matthias Stüerwold. Dat Who is who vun de plattdüütsche  Welt gifft sik de Klink in de Hand in Stormarn.
Ut dree Veranstalten vör 22 Johr sünd middewiel twee  proppenvulle Weken worrn mit en Programm, wo för jeedeen wat dorbi is.
Hartlichen Glückwunsch dorto!!
Un dat is lang nich blots Ünnerhollen – wobi Ünnerhollen jo nix Slechtet is:
To’n Bispeel de legendären Kunstvördrääg vun Hans-Thomas Carstensen, de uns siet lange Johren de Klassiker verkloort. Dat is bestet Infotaiment, as een op goot Plattdüütsch seggt. Düt Johr övrigens Michelangelo. Dat is toglieks en schöön Bispeel dorför, dat sik Opbuen lohnt. „Fasthollen deit kriegen“, seggt een jo.
Den Opslag maakt Jan Graf
Un dat is jüst ok dat Stichwoort för dat Projekt „Funklock stoppen“, op dat ik kott an düsse Steed henwiesen  müch.
Tohoop mit Jan Graf un Christiane Ehlers vun’t Nedderdüütschsekretariat maakt wi uns för en plattdüütschen Senner stark, de jeden Dag op Platt Programm maakt. Un nich blots en poor klöterige Minuten inquetscht twüschen Norichten un Morgenandacht. Nee, en Senner mit plattdüütsch Norichten, Reportoschen un Bidrääg.
Warrt nix, seggst du?
Tööv man af. Vun Stormarn lehrn, heet siegen lehren, as de Volkmund weet. In 22 Johr hebbt wi dat.
Bestimmt!

Vertellen vun fröher - Vertellcafé mit' Zentrum in Sövenbööm
NoordNoordOost - "Hool dat Muul vun Politik" Liederaturavend mit Jochen Wiegandt an'n 30. Oktober in Loonborg
Nach oben