Heiko Thomsen (Foto: Andrea Funk)
Heiko Thomsen (Foto: Andrea Funk)Schoolmeester Bloom kann nich slapen
„PLATT FÖR HÜÜT UN MORGEN“, NEDDERDÜÜTSCH AUTORENDREPEN 2021
Heiko Thomsen

Schoolmeester Bloom kann nich slapenMutanten-Stadl

… in mien Kopp is dat jümmerto an’t Rattern ik wülter mi vun een Siet na de anner un wedder trüch un Molly is liesen an’t Snorken se hett dat goot de Deern kann slapen un ik ligg hier un de Gedanken brummküselt as seet dor en Brummer in mien Dööts in de letzte Stunn heff ik dreemal op de Klock keken is noch veel to fröh to’n Opstahn noch nich mal Klock veer man ik finn keen Slaap mehr mutt jümmerto an de School dinken an morgen an mien Ünnerricht in de 10a denn geiht dat wedder los mit düssen ganzen niegen Technik-Kraam un ik stah dor vör as Don Quichote vör sien Windmöhlen wo mi de Arbeit mit de Kinner doch fröher jümmers so veel Spaaß maakt hett ik bün geern Lehrer ween heff nie nich wat anners maken wullt bit dat losgung mit düsse döösige Digitalisierung mit all dat IServ un DiViS uns niege Verwaltungssoftware wat is dor soft an fraag ik mi in de eersten Johren heff ik mi dor gor nich groot um scheert heff mi dor so dörchmogelt mit mien ooltbackschen Methoden as mien jungen Kollegen seggt un mien öllerhaftigen Ansichten man nu snackt se opmal vun nix anners mehr blots noch vun Klappreekners juppdi wi bruukt mehr Klappreekners jeedeen mutt nu en Klappreekner hebben en digitalen Endapparat denn warrt allens beter denn geiht dat vun ganz alleen mutt jo en dullen Kraam ween so’n Klappreekner mi dücht wi bruukt bald gor keen Schoolmeesters mehr blots noch Lüüd de mit Klappreekners spelen köönt jo sünd se denn all mall worrn uns Politikers Klappskallies klapperdiklapp geiht de Klappsmöhl wenn düsse Spöök nich bald ophöört gah ik togrunn dat stah ik nich dör dat segg ik di Molly dat is so vertrackt ik kaam dor nich mit torecht mit düssen niemoodschen Kraam BigBlueButton un IServOpgaven-Modul fröher bün ik doch jümmers wunnerbor kloorkamen mit all mien Opgaven mit mien Arbeit in de School mit mien Kollegen mit de Schölers mit de Öllern hett nie nich Arger geven heff jümmers en goden Stand hatt Herr Bloom warrt sik dor um kümmern Herr Bloom kriggt dat wedder hen laat dat man Herr Bloom maken hebbt se jümmers seggt man nu is de Bloom afknickt is wegsackt daalsackt as so’n lahmen Boxer de en gehörigen Slag afkregen hett un nich wedder op de Been kümmt Bloom is k.o. Bloom liggt an de Eerd de Bloom blöht nich mehr kannst nix an ännern bruukst di nix vörmaken Leo keen Geschichten vertellen keen Lögenmäärkens för Padlet & Co büst veel to paddelig to Leo to döösbaddelig kannst maken wat du wullt du kriggst düssen digitalen Kraam nich in dien Dööts rin warrt Tiet dat du mit Molly snackst vertell ehr man dat se di nu nich mehr loswarrt dat du nu to Huus bliffst Leopold Bloom geiht op’t Olendeel mit nich mal sösstig se wiest nu al mit jümehr Fingers op di all de Digitalisierungsfanatikers all de Koppkranken digitalis fanatica höögt sik een över dien Döösbaddeligkeit sogor de Schölers wo kaamt wi denn dor hen wenn de Schölers klöker sünd as de Schoolmeesters snaaksche Tieden sünd dat dat segg ik di Molly man is jo keen Wunner wat hebbt mien Öllern sik dor blots bi dacht as se mi Leopold nöömt hebbt Leopold woans sik dat al anhöört dat is doch keen Naam för en modernen Minschen de in’t Internett surft Leopold de Naam weer doch al antiek as ik em kregen heff man du hest em jümmers lieden mucht Molly Leo hest du seggt un Poldi un letzten Sommer in Frankriek Müsjö Blö un in Grekenland op uns Segelboot Sindbad dor hest du Odysseus seggt Molly un Bloombad hest du seggt as ik över Bord gung in den groten Storm un du hest mi wedder ruttrocken bald warrt dat hell Molly denn snack ik mit di man eerst mutt Bloombad noch beten slapen he is so mööd as weer he op Reis west un jüst eerst wedder trüchkamen ut ferne Länner mit Sinnbad de Sehfohrer oder weer dat Blinnbad de Blähfohrer mit Tinnbad de Teefohrer un Finnbad de Feefohrer un Rinnbad de Rehfohrer un Winnbad de Wehfohrer un Klinnbad de Kleefohrer un Flinnbad de Flehfohrer un Drinnbad de Drehfohrer un Sninbad de Sneefohrer un Ginnbad de Gehfohrer un Stinnbad de Stehfohrer un Zinnbad de Zehfohrer away dream all away …

Imagefilm

Missingsch-Film

Veranstaltungen

Nie’es

Nach oben