Petra KücklichTallen
NEDDERDÜÜTSCH AUTORENDREPEN DIGITAL 2020
Petra Kücklich

Tallen

Güng jo dat an’n Anfang vun düsse Corona-Tieden ok so, dat ji reinweg jieperig no Informatschonen weern? Mutt ik bang ween, dat ik mi ansteken do? Warrt dat hier so leeg as in Italien oder Spanien? Mookt se nu allens dicht oder wat mookt se wedder op? Woans kann ik mi schulen? Gifft dat al wedder niege Vörschriften? Un sünnerlich de Tallen: Woveel hebbt sik vundaag wedder ansteken? In’e Welt, in Europa, in Düütschland, in uns Stadt? Woveel leegt in’t Krankenhuus? Woveel sünd al doot bleven an düsse Süük? Bi uns tohuus weer dat de eersten Weken meist en Wettstriet, keen toeerst de niegen Tallen kenn. Hest al mitkregen? Vundaag sünd dat al wedder sounsoveel Niege!

Nu müss mien Dochter annerletzt in’t Krankenhuus, för en lütte Operatschoon, de al lang ploont weer. Wi hebbt al mit rekent, dat se de verschuven wörrn. Man dat hebbt se nich un mien Dochter müss nu doch hen. Ok dor stünn de Schuul vör Corona bobenan. Dörvst nüms mitbringen no’t Krankenhuus. Dat güng blots bi lütte Kinner, un dat is mien Dochter nu jo al lang nich mehr. So is se an’e Straat blots gau ut’t Auto rutjumpt. Ik kunn knapp noch ropen: “Tschüss, allens Gode!” Un weg weer se. Man över Smartphone kannst jo in Kuntakt blieven un so kreeg ik meist in Echttiet mit, wat mit ehr passeer. Bi de Ingangsünnersöken weer se so opreegt, dat Puls un Blootdruck orrig wiet no boben utneiht sünd. Dor hebbt se ehr eerstmol wat geven, dat se beten geruhiger wörr. Dorno weer se heel entspannt. Dat se ewig op’n Gang sitten un töven müss, bet se en Stuuv un en Bett för ehr harrn – kann vörkomen. Un as dat denn heet: „Deit uns leed, mit Se ehr Operatschoon warrt dat vundaag nix mehr! Dor sünd uns toveel Nootfäll twüschen komen“, dor hett se vull Kroosch den Vörslag annohmen, dat se annern Morgen glieks de eerst op‘n OP-Disch ween schall. Annern Morgen weern de Werte ok wedder normal.

De Operatschoon hett mien Dochter denn ok goot överstahn un wull sik denn eerstmol utrohen. An’n Nomiddag kreeg ik denn vun ehr en Noricht tostüert: „Nu sünd dat wedder 131!“ Wat meen se denn dormit? Blootdruck mag jo noch angahn. Puls weer jo beten dull, wenn du nich jüst bi büst, Sport to moken, oder achtern Bus achteranjachtert weerst. Dor müss ik doch gau nofrogen: „Puls oder Blootdruck?“ De Antwort keem foorts: „Soveel Lüüd hebbt sik in uns Stadt nieg mit den Virus ansteken!“ – Ach jo, dor weer jo noch wat!

Veranstaltungen

Wat gifft‘ Nie’es?

Nach oben