Sleswig-Holstener-Dag an’n 3. Juli in Molfsee

De Dag vun de Sleswig-Holstener hett de sleswig-holsteensche Heimatbund an verleden Sünndag op dat Rebeet vun dat Frielichtmuseum Molfsee op de Been stellt. An en richtig hitten Dag hebbt liekers vele Lüüd den Weg na dat Museum bi Kiel funnen. Sodennig weer twüschen ole Buernhüser, Möhlen un Spiekers düchtig wat loos. Bummelig 40 Verenen, Verbännen un Organisatschonen ut dat ganze Land hebbt dorbi ehr Arbeit wiest. En Swung Lüüd kemen in de Drachten vun de verscheden Regionen in’t Land, man ok traditschonelle Kledaschen vun wiet weg, ut Grekenland oder Syrien, kreeg een in Molfsee to sehn. Jüst so geev dat blangenbi Shanty- un  Posaunenchöre Musik ut de Türkei un Südamerika. Wat för jeedeen „Heimat“ is, wiest sik ok in Sleswig-Holsteen al lang as en buntet, veelstimmig Bild.

Dat Intress an Plattdüütsch is dorbi wiederhen groot. Buten vör de Winkelschüün weer dat Holstener Zentrum tohoop mit de Kollegin vun’t Lecker Zentrum un de vun vun’t Nedderdüütschsekretariat vertreden. Mit lütt plattdüüsch Radels un Quiz’ weer an uns Stännen jümmers fix Bedriev. Un sodennig kaamt wi mit de Besökers gau in’t Gespreek. Vele hebbt en biographische Verbinnen oder en vunwegen de Familie to Plattdüütsch.

Christiane Ehlers (Nedderdüütschsekretariat), Thorsten Börnsen (Nedderdüütschzentrum Mölln), Nadine Koop (Nedderdüütschsekretariat), Gesa Retzlaff (Nedderdüütschzentrum Leck)

Man bi’n Snack wiest sik ok, dat för mennigeen de Spraak to wenig sichtbor is. Se dückert nich öft noog op in de Öffentlichkeit. Vele wünscht sik mehr Sichtkuntakt mit ehr. Dat kunnen tweesprachig Oortsschillers, Info- un Wiespahlens jüst so as mehr Medienanbotten ween. Un so kunnen wi na düssen Sünndag dat Fazit trecken: Platt is twor ordig beleevt – man veel to liesen!

Autorendrepen in Mölln
Plattdüütsch Höörspeel in Heid

Veranstaltungen

Wat gifft‘ Nie’es?

Nach oben