Plattdüütsch Theater is eher mal nich dorvör bekannt, dat dor moderne Stücken speelt warrt. Wat to’n Högen mutt dat ween. Een will  dat Publikum jo nich noch mit en Problemstück kamen. An’t Enn fallt dat dörch oder de Tokiekers blievt glieks ganz weg, sünd vele Bühnen bang. Un liekers geiht dat. Dat hebbt de Jungen Lüüd ut Löwenstedt nu ünner Bewies stellt. Dat Stück „In de Juni geev dat immer Erdbeeren“, wat an’n 19. September Premiere harr, dreiht sik üm Flüchtlinge, un is hoochaktuell. Allerdings nich so, as wi dat verwachten deen. Nee, keen syrische Familie in Noorddüütschland. Jüst annersrüm, Löwenstedter, Dörpslüüd ut Noordfreesland, leevt in’n Nahen Oosten. Se mussen ut ehr Heimat weg, wieldat dor Krieg weer. In ehr nie’e Tohuus hebbt se to kämpfen mit de Hitten, de Spraak, de anner Sitten un vör allen mit dat Heimweh. Wölken kaamt goot mit de nie’e Ümgeven kloor. För annern is dat keen Leven in de Frömde. Se doot sik swoor un finnen sik torecht mit düsse heel un deel anner Welt. Düt Stück hett den Nerv vun de Tiet drapen un den Nagel op den Kopp.
Korten för de nächsten Vörstellen (16., 18., 23., 24., 25., 29., 30. un 31. Oktober ümmer üm 19:30 in de Gaststeed Friedensburg Löwenstedt) kann een ünner junge-luud@web.de bestellen.