Wi künnt ok anners: Adventskalenner to’n Tolustern ut Rellingen

Friederike Bauer
Friederike BauerRellinger Theaterverein
“Adventskalenner to’n Tolustern ut Rellingen”

De Rellinger Theaterverein maakt düt Johr en besünner Aktschoon. Se hebbt en Adventskalenner to’n Tolustern op de Been stellt. Vun’n eersten bet to’n 24. Dezember kannst di nu jeedeen Dag en plattdüütsch oder hoochdüütsche Geschicht op jümehr Homepage anhören. Doröver heff ik mit de Vörsittersche vun den Vereen Friederike Bauer snackt. Se hett den Posten eerst düt Fröhjohr övernahmen. Mit den Start güng dat also glieks in swore See. Veel Ünnerstütten hett se dörch ehr Vörstandskollegens Dirk Schaller un Raina Kleen. Teamwork is allens in Rellingen.

Fru Bauer, woans sünd Se nu op de Idee kamen un maken en plattdüütsch-hoochdüütschen Adventskalenner to’n Tolustern?
Wi hebbt dat al bi den eersten Shutdown in’t Fröhjohr maakt. Wi harrn jüst de Generaalproov vun dat nie’e Stück torecht un denn keem de Lockdown. Un so kunnen wi dat jo nich mehr spelen. Besünners för de öllere Lüüd weer dat nich eenfach, dat mit eenmal allens utfallen müss. Un nu künnt se uns so tominnst hören.

Un leep dat foorts allens glatt?
Dat weer gor nich so eenfach. Wi mussen jo de Rechte hebben vun de Autoren, vun de wi Geschichten vörlesen wullen. Wöcke Schrieverslüüd wullen dat anfangs nich geern. Man wi hebbt ok sehr nette Kuntakten to de Autoren kregen. To Hermann Bärtel un Jürgen Timm to’n Bispeel. De hebbt uns bannig hulpen.

Woans sünd Se an Ehr Vörlesers kamen?
Wi hebbt bi uns Mitglieders fraagt, wokeen Lust hett un lesen vör. Wi sünd jo en groden Vereen mit üm un bi 100 Mitglieders. Vele hebbt sik mellt. Elkeen de lesen will, söcht sik sien Text ut un leest den in. Een vun uns maakt denn de Recherche, wokeen de Rechte an den Text hett un wokeen wi fragen mööt. Dor hett een denn ok ganz goot mit doon. Dat is veel Arbeit.

Woans süht de Bedriev bi Jüm ut, wenn keen Corona is?
Wi speelt normalerwies dreemal in’t Johr. Twee plattdüütsche Stücken un en Kinnerstück op Hoochdüütsch. Egentlich sünd wi en Wannerbühne. Wi speelt söven-, achtmal an ünnerscheedlich Steden hier in’n Kreis Pinneberg. Wi hebbt vele Tokiekers, de uns denn achteran seggt, dat se dat goot gefullen hett.

Ik stell mi dat gor nich so eenfach vör un maken hier so dicht bi Hamborg plattdüütsch Theater…
Dat stimmt. Ok lang nich all öllere Lüüd, de hier wahnt, künnt Plattdüütsch. Vele sünd vun annerswo hertrucken. Un in Hamborg gifft dat jo ok noog Theaters.

Wat maakt Se, dat de Lüüd liekers na Jüm henkaamt? Un woans spreekt Se junge Lüüd an?
Bi jedet Stück künnt de Tokiekers an een Avend na de Opföhren en Blick achter de Kulissen maken. Dat intresseert se. Un för uns is dat schöön un hebben de Neegde to de Lüüd. Dorbi kriegt se ok mit, woveel Arbeit dorachtersteken deit. Un de een oder annere blifft denn ok bi uns un maakt sülvst bi’t Theater mit.
De jungen Lüüd, de bi uns mitspelen doot, gaht op en Seminar vun den Landesverband* un lehrt dor. Un dat maakt natürlich Spaaß so en Kurs to maken mit fief, söss Lüüd in’t sülvige Öller tosamen. Wichtig is, dat se dat Geföhl hebbt, se künnt ok mal Fehlers maken. Dat is denn nich slimm.

Wo veel Lüüd sünd bi de Bühne aktiv mit dorbi?
Allens mitreekt hebbt wi ungefähr 70 Aktive. Dor sünd denn Lüüd för de Kass, för’t Programm un de Press tostännig. Annern möögt geern Kulissen buen un Kostüme maken. Wichtig is, dat elkeen ganz veel weert is. Jeedeen hett sien Platz. Un wenn all tosamenarbeiden doot, denn klappt dat ok. Dat is Teamwork.

Woans sünd Se persöönlich to’t Theater kamen?
En Fründ hett mi mitsnackt. Wi wullen beide Theater spelen. Dor weer ik 18 Johr oolt. So bün ik to de Bühne in Rellingen kamen. Ik heff al vörher in de School Theater speelt. Man blots op Hoochdüütsch. An’n Anfang heff ik gor nich so veel plattdüütsch snackt. Dat heff ik denn bi’t Spelen op de Bühne lehrt.

Wat is de Plaan för de Tokunft?
Wi wüllt in’t negste Fröhjohr in’n April oder Mai, „Wi sünd keen Engels“ spelen. Dat Stück, wat wi egentlich düt Johr al op de Bühne bringen wullen. Wi wöörn denn dormit nich wannern, as wi dat normalerwies doot. Sünner wi wüllt dat fiefmal hier in Rellingen in de Turnhall spelen. Wenn dat denn mööglich is.

Tolustern lohnt sik bi den Rellinger Audio-Adventskalenner:

Rellinger Audio-Adventskalender

*Landesverband der Amateurtheater Schleswig-Holstein e. V.

Nach oben