Wi künnt ok anners: Herbert Frauen vun’n Heimatverband Steenborg

Herbert Frauen
Herbert FrauenHeimatverband Steenborg

Herbert Frauen is twete Vörsitter vun’n Heimatverband in’n Kreis Steenborg un för frischen Wind.

Lang Tiet vun sien Beroopsleven hett he as Schoolmeister un -leiter in Glückstadt arbeidt. Dorvör is he Buer west in Herzhorn bi Glückstadt, wo he wahnt hett un opwussen is. Un wenn he över ehrenamtlich Engagement snacken deit, is Herbert Frauen in sien Element. He weet, vun wat he snacken deit. 25 Johr weer he Gemeenvertreder in sien Heimatdörp. Dorto kaamt noch 19 as Wehrföhrer bi de friewillige Füerwehr.

In de letzten Johr is dat sworer worrn för dat Ehrenamt, hett Frauen faststellt. Dat dröppt praktisch all Verenen un Verbännen un besünners de Kommunalpolitik. De Lüüd möögt sik nich mehr so lang un so verbindlich fastleggen. Fröher weren se meist ehr ganzet utwussen Leven lang Maat bi de Füerwehr, in’n Spoortvereen un in de Schüttengill. Vundaag kiekt se sik nipp un nau wat ut, wo se Lust to hebbt. Wöcken hölpt mit un planen en Dörpsfest to’n Bispeel. Dor sünd se denn ok mit Swung un Knööf dorbi. Man dat heet nich, dat se de negsten 20 Johr automatisch mit vun de Partie sünd, wenn dat wedder wat to organiseren gifft. Dat is denn öfters mal en eenmalige Saak. „Begrenzte Tiet, begrenzte Verantworten“, bringt de pensioneerte Schoolmeister düsse Instellen op den Punkt. Aver jüst dat is dat A un O bi dat Landleven: „Dat Leven op’t Dörp is blots dorüm intressant, wieldat een sik goot kennen un sik hölpen deit“. Ok wenn sik de Instellen vun de Lüüd ännert hett, so süht de 71-johrige doch ok Verenen un Verbännen in de Plicht. Nie’e Formaten un Ideen mööt ran, woans een de Lüüd wedder nieschierig maken kann un begeistern för’t Ehrenamt. Dat mutt ok Spaaß maken un engascheren sik: „Du kannst nich jümmers wat beduern, wat sik doodlopen hett“, seggt he.

Dormit sünd wi jüst so bi uns twete Thema. Herbert Frauen is twete Vörsitter vun den Heimatverband in’n Kreis Steenborg. „Wi mööt uns wat överleggen, wo wi attraktiv blieven könen“. Ok hier geiht dat üm frischen Wind un nie’e Formaten. Dorbi is de Heimatverband goot opstellt. 600 Maten hett he. Meist all Gemeenden in’n Landkreis höört dor mit to. Dat hett Vör- un Nadelen. Vunwegen all de institutschonellen Mitgleder un wenig Matens ut ‚Fleesch un Bloot‘ gifft dat keen richtige Vereensleven. „Dat beduer ik mennigmal“, seggt Frauen. Een mutt sik rögen, frische Ideen rankriegen, dat de Organisatschoon in Gang blieven deit. Dorvun is he övertüügt. So en Bispeel för wat Nie’et kannst’ bi den nedderdüütschen Kring vun den Verband beleven. Siet teihn Johr löppt en Projekt mit tweesprachig Infotafeln. All 230 Tafeln to Kultur- un Regionaalgeschicht in Steenborg sünd vundaag nich blots op Hoochdüütsch schreven. Nee, ok op Platt kann een se lesen. Dat alleen weer jo al en groten Erfolg, wenn du dat mit anner Ecken vun’t Land verglieken deist. Dor gifft dat mennigmal gor nix in de Regionaalspraak. Aver nu sünd se bi un spreekt all plattdüütschen Texten tosätzlich ok noch in. Över en QR-Code kannst du di denn de Audioversion op dien Plietschfon halen un vörlesen laten.

Loosgahn is dat 1934. De dormalige Landraat wull en Heimatmuseum grünnen un hett dorför de Gemeenden in’n Kreis mit tohoophaalt. Dorvun is denn de Heimatverband worrn. Wat in de NS-Tiet in’n Kreis passeert is, optoarbeiden un to wiesen, höört hüüt mit to de Arbeitsrebeten mit to.

„Du kannst nich jümmers wat beduern, wat sik doodlopen hett“
Herbert Frauen

De Opgaav is, „dat Gedächtnis vun de Region“ ween. So kiekt Frauen dat an.
Vundaag sünd veer sülvstännig Krings in den Verband togang: Nedderdüütsch, Botanik, Archäologie un Kultur- un Regionaalgeschicht.

Uthängeschild is dat Johrbook. Dat warrt al siet 1957 rutgeven un kümmt nu op 65 Oplagen. Jedet Johr gifft dat en anner Swoorpunkt vunwegen dat Thema. Dat Johrbook 2021 kiekt op Geschicht un de Laag vun’t Plattdüütsche in’n Kreis. In’t tokamen Book schall dat üm Gloven gahn. All 53 evangeelschen Karkengemeenden stellt sik dorbinnen sülvst vör. Afsehn dorvun warrt över den Islam snackt, de middewiel ok en Rull speelt in Steenborg. Un över den olen jöödschen Freedhoff in Glückstadt natürlich. Den hebbt Sepharden, jöödsche Inwannerers ut Spanien un Portugal, to’n Anfang vun’t 17. Johrhunnert grünnt. Tosamen mit den Freedhoff in Hamborg-Altna is he de öllste vun sien Oort in Noordeuropa. Man sünnerlich spannend is de Fraag, wat de Gloven vundaag för de Minschen överhaupt bedüden deit, meent Herbert Frauen.

Wenn een so op kieken deit, wat dor an ünnerscheedlich Themen tosamenkümmt, mutt een nich bang ween, dat em dat langwielig warrt. Ok in Tokunft nich.

Nach oben