Klaus Schlie is de Präsident vun den Sleswig-Holsteenschen Landdag. He is 63 Johr oolt, verheiraad, hett dree erwassen Kinner un kümmt ut Mölln. Wi freut uns, dat he den Optakt maakt to de Reeg „Wi künnt ok anners“!

Landtagspräsident Klaus Schlie (Foto: Schleswig-Holsteinischer Landtag)

Du büst bekannt dorför, dat du di as Politiker för Plattdüütsch starkmaken deist. Wo kümmt düt Engagement her?

Plattdüütsch is uns Heimatspraak. As Landagspräsident heff ik en besünner Verantwoorten, dat de Spraak, de dat Land Identität geven deit, ok erhollen blifft.

Gifft dat en persöönlichen Betog, den du to de Spraak hest?

Mien Vader weer jüst so as ik boren in Sleswig-Holsteen. He hett Plattdüütsch snackt un leev hatt. As Möllner „Jung“ kiek ik düsse Traditschoon ok as en persöönlich Verplichten an.

Liekers dat nich dien Moderspraak is, snackst du Platt. Is dat swoor un lehren Nedderdüütsch?

Je länger ik ok Reden op Plattdüütschen halen do, desto sekerer warr ik dormit. Un desto mehr Freud heff ik dorbi un snacken de Spraak aktiv.