LPP 143 bi dat Plattbeatsfinale 2019 in Kiel (Bild: Florian Klein).

Moin LPP 143. Villicht kunnst Du an’n Anfang en beeten över Di un Diene Musik vertellen.
Moin! Ik bün LPP 143 ut Kiel-Gaarden. Opwussen bün ik negen Kiel, man ik leev hier nu al siet foftein Jahren. Musik maak ik siet ik Söß or Söben bün – dat week ik nich mehr so nau – aver toerst blots Trompete un denn later ok noch Rap und Sang. Ik glööv, mit Rap heff ik mit Negentein anfungen – dat heet, ersmal blots Texten schrieven, ni mehr. Later denn Konzerten speelt un mittlerwiel ok al dree Kassetten ruutbröcht. Ik glööv, min Rap köönt een wull „Oldschol“ nömen, mit en düchtigen Portion Woordspeelen un Raasch ut’n Harten.

Wo büst Du op de Idee kamen un maaken Songs op Platt? Un wat för Songs sünd dat?
Ik heff vor Jahren mal n Beat vun’n Frünn nahmen un anfungen, dor Riemels op platt op to schrieven. Man blots so af un an mal een, twee Riemels. Denn hett mi een Früünsch, de ok rappt, vun Plattbeats vertellt un wat ik dor nichmal mitmaken wull. Denn heff ik de Song to Enn schreven un mitmakt. Een Jahr later nochmal, un dütmal denn ok den dörten Platz makt. Ik würr seggen, de erste weer mehr so’n Versöök un ok n beten wat Stückwark. In’t tweete Jahr heff ik denn een Song över Kunst und dat leeve Geld schreeven. Dorto kömt denn noch een Part vun mi op een Projekt mit Namen „Platt together“, dat weer een grotartig Projekt! Un denn kömen noch annere, man dar kann ik noch nix to seggen.

Gifft dat för Di en Ünnerscheed, wat dat Rappen op Platt un op Hooch angeiht?
Jo, ik bruuk wat länger, üm de Texten to schrieven op Platt. Hochdüütsch snack ik in’n Alldag wiet mehr, dat heet, dat löppt wat infacher. Bi’t Rappen is dat ’n beten wat ümdreiht: Plattdüütsch hett ’n beteren Flow, weniger viegelinsche Konsonantenkombinaschoonen, de een nich so good gau rappen kunn as in’t Hoochdüütsche.

Snackst Du ok in’n Alldag Platt?
Wenig. Ik leev in Kiel un all mien Frünnen snackt Hoochdüütsch. Een paar köönt wohl ’n beten wat Plat snacken, aver dat is denn faken infacher, gröttstendeels op Hoochdüütsch to snacken.
Ik much Platt al, as ik Lütt weer, heel gern un wull dat jümmers beter snacken können. Ik heff ’n beten wat vun min Grotmutter un de olen Lüüd op’n Dorp lehrt un denn een Barg Bööker un anner Schrievkram op Platt lesen, jüst wiel ik de Sprook so gern much.

Wat för en Image hett Platt ünner junge Musiker na Dien Wahrnehmen?
Dat is viegelinsch to seggen. Ik denk, ünner Rappers allen gifft dat ’n Barg verscheeden Meenen, wat dat nu cool or to’n Lachen or infach ’n beten wat spööksch is, wenn een op Platt rappt. Ik glööv, faken hett dat veel mit de persönlichen Erfahren to doon, de en Minsch mit Platt makt hett.

Hier kann een sik „Dörti Daler“ vun LPP 143 anhören: