Wiehnachtsfier vun’t Nedderdüütschzentrum in Mölln

Düt Johr weer dat wedder so wiet: Nadem de Weihnachtsfier vun’t Nedderdüütschzentrum un de Landdagspräsidentin in de verleden twee Johren utfallen müss, funn se nu wedder so as in de Johren vörher in’n Stadthauptmannshof in Mölln statt. In de histoorschen Muern vun den olen Sitz vun de Lübecker Stattholers geef dat düt Johr nich blot de Gelegenheit, sik mal wedder persönlich to drepen, man ok nedderdüütsche Musik- un Textbidrääg to hören.

Den Avend eröffnen dee de Landdagspräsidentin Kristina Herbst. Ehr Vörgänger in düt Amt, Klaus Schlie, weer in sien Amt as Präsident vun de Stiftung Herzogtum Lauenburg ok düt Johr dorbi. Ok de Minnerheitenbeopdragte vun’t Land, Johannes Callsen, keem na Mölln. Thorsten Börnsen, de Leiter vun’n Zentrum in Mölln, stell de Arbeit vun’t Zentrum vör un vertell vun sienen Besöök in Italien bi dat SUNS-Festival för Regional- un Minnerheitenspraken un vun den plattdütschen Bandwettbewarf Plattbeats, de vun’t Zentrum organiseert warrt.

Musikaalsch güng denn ok dat Programm los. Mire Buthmann vun de Tüdelband weer düt Mal solo to hören un nich an ehr Stamminstrument, de Gitarr, man an’t Piano. Dat weern wunnerbor wiehnachtliche Leder, de se vordregen hett. Ok Nikos Saul un Gesche Gloystein hebbt sik mit ehr Slam-Texten an de Weihnachtstiet orienteert. Vun Nikos Saul geef dat lyyrsche Texten över Wiehnachtsmarkten un Wunschzeddel to hören – Texten, de oft Anlaat to’n Lachen geven hebbt, man tomeist ok eernsthaftig grundeert weren un sik mit polietsche Themen befaat hebbt. Ok bi Gesche Gloystein stünnen polietsche Themen, besünners dat Nadenken över Konsum op’n Zeddel. Dat passt natürlich bannig goot to de Vörwiehnachtstiet. Dat güng üm den Tosamenhang vun den Kees op uns Fröhstücksdisch mit de Armot vun Melkbuern in afrikaansche Länner un dorüm, dat een öfter mal seggen schall: Dat kööpt wi nich.

Allens in allens weer dat en stimmig Programm ut Musik un Texten. An’n Enn hett denn Thorsten Börnsen noch en Geschicht vertellt över en Krippenspeel, dat feehlslaan dee, wiel dat Kind, dat den Weert vun de Harbarg in Bethlehem speelt hett, Josef un Maria eenfach rinlaten hett. Oder hett he dormit nich den Sinn vun Wiehnachten genau verstahn? Över düsse Fraag un de annern Texten un Leder kunnen de Besöker achteran bi Supp un wat to drinken snacken. Tokamen Johr finnt de Wiehnachtsfier in’t Nedderdüütschzentrum in Leck statt.

SUNS in Udine - dat Festival för Regional- un Minnerheitenspraken 2022
Offener Kanal warrt 30 Johr oolt
Nach oben