Missingsch – en Film vun’t Nedderdüütschzentrum över de Mischspraak twischen Hooch un Platt

In de ni‘e Sünnerutgaav vun de Reeg „Spreekperlen – Spraakgeschichten ut Norddütschland“ geiht dat üm de Mischspraak twischen Hooch un Platt: Missingsch. Düsse Spraakform hett sik bannig lang holen, un Sporen vun Missingsch finnt en noch vundaag. In den ni‘en Film vun‘t Nedderdüütschzentrum Holsteen söökt Thorsten Börnsen, de Leiter vun‘t Zentrum, düsse Sporen in Hamborg un in‘t Stadtmuseum Wedel. Dorbi gifft he nich blot en Överblick över de Geschicht vun Missingsch vun’t 17. Johrhunnert an, he maakt ok an Bispelen kloor, wo veel missingsche Wöör vundaag noch bruukt warrt.