Ratzborg – Allens weer meist düüster, de Beamer flacker. He smeet dat Bild vun en Pokal un „PowerPoint-Karaoke – Hoochdüütsch vs. Plattdüütsch“ an de Wand. Op Initschatiev vun’t Zentrum för Nedderdüütsch in Holsteen funn an’n 29.11.25 in’n Kinner- un Jugenddrep Stellwerk in Ratzborg en Premieer statt. Dat Improvisatschoonsformat PowerPoint Karaoke weer nu ok to’t eerste Maal op Plattdüütsch to beleven. PowerPoint Karaoke hett dorbi nix mit Singen to doon, de Deelnehmers mööt en Vördrag to en Präsentatschoon holen. De seht se aver op de Bühn dat eerste Maal. So müssen de Deelnehmer un Deelnehmerschen sik in’t Team Plattdüütsch över de besten Wiehnachtsgeschenken för Mitarbeiders, Bahnreisen in’t 21. Johrhunnert un wat Balkonien dat betere Mallorca is, Gedanken maken. För Team Plattdüütsch stünnen Dieke Günther (Hamborg), Heiko Thomsen (Hamborg) un Frauke Nesemann (Lübeck) op de Bühn. In Team Hoochdüütsch stünn toeerst blots Lealice Luckmann (Hamborg) fast. In de Paus kunnen sik noch spontan Lüüd för Team Hoochdüütsch anmellen. In’t Team Hoochdüütsch müss överleggt warrn, woso Socken in de Waschmaschien verloren gaht, wat de beste Nudelsoort is un of Poggenstöhl de Weltherrschop övernehmt. Beweert worrn sünd de Vördrääg vun en Jury ut dree Lüüd, de sik ut’t Publikum rut an’n Anfang vun de Veranstalten billt hett. Se harrn för jeedeen Vördrag Punkten vergeven. An’t meist övertüügt hett de Jury de Spontan-Vördrag vun Dieke Günther. Somit harr an’t Enn Team Hoochdüütsch de Nees vörn.
Winner Dieke Günther freit sik över sien Pokal
