Üm Spraken in’t junge Öller to lehren, büdd neven de Familie un dat däägliche Ümfeld, de School de richtige Anloopsteed. Siet August 2014 gifft dat Modellscholen Nedderdüütsch in Sleswig-Holsteen. Domals weren 27 Grundscholen bedeligt. To’t Schooljohr 2024/25 gifft dat nu 41 Grundscholen un 12 Scholen mit Sekundarstufe I, de Modellscholen sünd. So lehrt aktuell üm un bi 3.700 Schöler an de Modellscholen Plattdüütsch. Siet 2019 gellt de Erlass „Niederdeutsch in der Schule“, de dat Teel hett, de Anbotten vun Plattdüütsch an de Scholen uttobuen. Middewiel gifft dat twee Lehrwarken mit „Emma un Paul“: „Emma un Paul sackt plattdüütsch“ för de erste un tweete Klass un „Emma un Paul un ehr Frünnen“ för Klass dree un veer. En Book för öllere Kinner is in Planen. Bavento gifft dat ok en Barg an Begleitmaterial ümsünst in’t Internet. Dat Institut für Qualitätsentwicklung an Schulen (IQSH) is de Anspreekpartner, wenn dat üm Wiederbillens för Lehrers un Platt-Paten geiht.

Seit 2014 gibt es Modellschulen Niederdeutsch in Schleswig-Holstein. Im Jahr 2025 gibt es insgesamt 53 Modelschulen. Der 2019 in Kraft getretene Erlass „Niederdeutsch in der Schule“ strebt einen geschlossenen Bildungsgang zum Erwerb der Regionalsprache an. Somit soll es von der Einschulung bis zum Abschluss der Sekundarstufen bzw. der beruflichen Bildung möglich sein, Plattdeutsch zu erlernen.