Christiane Johannsen is Lehrerin an de Grundschool in Müssen, de ok plattdüütsch Modellschool is. Se is verheiraadt, hett twee grote Kinner un wahnt in Swattenbeek. Mit ehr heff ik över de Tücken vun’n Distanzünnerricht snackt, woneem ehr Lust op de Spraak herkümmt un woans dat löppt mit Platt an de School.

Lehrerin un Plattdüütsch-Fan Christiane Johannsen

As dat mit de School wedder loosgüng, weren de Lehrers eerstmal froh. Denn Distanzünnerricht is jüst bi de Lütten nich eenfach. Veel löppt över den direkten Kuntakt. Un de is jo denn heel un deel wegfullen. Besünners fehlt dorbi de Ritualen, krigg ik to weten. Begröten, singen, verafscheden höört to’n Ünnerricht mit to, wenn all tosamenkaamt. As dat mit de School wedder loosgüng, hebbt se in Müssen eerstmal mit Wesselünnerricht anfungen. Dor weer jümmers blots en Deel vun de Kinner totiets in de Klass.
„Över de Tiet, as de School dicht ween is, hebbt wi en Nootbetreuung hatt. Vigeliensch bi den Distanzünnerricht weer, wat een de Kinner nich direktemang sehn kann un jüm hölpen“, vertellt se.

Un een müss sik eerstmal dorindinken, wat de Kinner bruukt, wenn se to Huus lehren doot.
Sodennig mussen se sik in de School wat infallen laten. Dat weer jo ok för de Schoolmeisters de eerste Pandemie.
„To’n Bispeel lütt Lehrfilms, Verkloorvideos, de wi för de Kinner maakt hebbt“, seggt Christiane Johannsen. De worrn denn in‘t Internet stellt un de Kinner kunnen sik de to Huus ankieken.
En anner Weg un hollen Kuntakt weer dat Telefon.
„Wi hebbt de Kinner een Mal in de Week anropen. Un denn heff ik mi för jedet Kind Tiet nahmen“. Man dat hett ok so sien Tücken.
De Kinner sünd dat gor nich wennt, mit ehr Lehrerin to telefoneren, un seggt denn öfters man blots „jo“ un „nee“. Mennigmal seggt se ok gor nix. Denn un wenn kannst du in’n Achtergrund Moder oder Vader seggen hören: „Du musst auch was sagen, Frau Johannsen kann ja nicht sehen, wenn du nickst oder mit dem Kopf schüttelst“.
De Lütten sind ok nich wennt west, dat se nu an’t Telefon vörlesen schullen. As Lehrerin mutt een jo weten, wo wiet de Kinner mit’ Lesen sünd. Man in Groten un Ganzen hett dat ganz goot klappt.
De Öllern hebbt ordig mithulpen un sünd dorbi en Oort Hölpslehrer worrn. Se hebbt veel mit ehr Kinner to Huus maakt, to’n Bispeel lesen öövt.

To’t Plattdüütsche is Christiane Johannsen över ehr Grootöllern kamen. De hebbt op Eiderstedt wahnt un Platt snackt. „Dor heff ik dat höört, un funn dat goot“, seggt se. Verstahn kunn se jümmers allens. Man in de School hett dat keen Plattdüütsch geven un in dat Studium ok nich.
1998 is de Schoolmeestersche denn vun Hamborg na Swattenbeek trucken. Dor hett se Plattdüütschkursen an de VHS maakt un sodennig ok dat Snacken lehrt. Ok bi de Foortbillen „Platt för de Lütten“ in Leck weer se mit an Boord.
Siet 2000 is se nu an de Grundschool in Müssen. Bewurven hebbt sik de Müssener al in de eerste Runn un wullen Modellschool warrn. Man dat hett noch bet to’t Schooljohr 2015/16 duert. Siet denn höört se mit to de middewiel 42 plattdüütschen Modellscholen in’t Land, de faste Stünnen hebbt för den Spraakünnerricht.
Woans nehmt de Kinner dat op?
„De Kinner gefallt Plattdüütsch, wenn dat wat to’n Spelen, Singen un Utproberen gifft. En nie’e Spraak is en Anreiz“, seggt Johannnsen.
Ok lesen doot se geern op Platt. Mit dat sülvstännig Snacken löppt dat, wenn de Schölers en fasten Rahmen dorför hebbt: „Bi en Rullenspeel geiht dat mit dat frie’e Spreken: Ik pack mien Kuffer to’n Bispeel”.

De Öllern seggt mehrstendeels nich so veel dorto. Wenn de Kinner Spaaß an’n hebbt, freut sik ehr Öllern ok, bericht Joahnnsen. Ik harr mi vörstellt, wat dat Diskusschonen över de Sinn-Fraag vun’n Plattdüütschünnerricht geven dee. In den Stil vun „Deit dat denn nödig? Is doch beter se lehrt Engelsch.“ Man so is dat gor nich. Kloor, ok hier bestätigt Utnahmen de Regel: „Eenmal hett hier een in’t Büro anropen un wull sien Kind bi uns anmellen, wieldat in Böken an de Grundschool Plattdüütschünnerricht geven dee. De kreeg denn to weten, wat dat in Müssen jüst so weer“, höögt sik de Schoolmeistersche.
Un wenn Se sik wat wünschen kunn?
„Egentlich wünsch ik mi en Kolleeg, de ok Plattdüütsch maakt. Mi wöör dat freuen, wenn wi uns tosamen wat överleggen deen. In’t Team maakt dat mehr Spaaß.“ Un en tweten Wunsch hett se ok noch: „Ik wöör mi freuen, wenn dat in’n Alldag mehr Gelegenheiten to’n Plattdüütschsnacken geven dee. Ik heff in de School acht Stünnen Plattdüütsch in de Week. As dat wegfallen dee, hett mi dat fehlt.“