„PLATT FÖR HÜÜT UN MORGEN“, NEDDERDÜÜTSCH AUTORENDREPEN 2023
Sylvia Glismann
De Kiekschapp un ik
Leve Lüüd, dat giff ja Saken, de glövt een nich. Uns Kiekschapp un ik sünd een wunnerlich, egenortig, vigeliensch.
Mien Mann seggt jümmers : Dat schaffst blots Du !!! Wo hest Du dat al wedder henkriegen?
To´n Bispeel kieken wi geern dat Sleswig – Holsteen – Magazin avends üm 19.30 op NDR 3. Dat hebbt wi op uns Feernbedenen op Nummer 3 ingeven. Wenn mien Mann op sien Platz op dat Sofa sitten deiht, denn kriggt wi Sleswig – Holsteen – Magazin, aver wenn mien Mann vörher rutgahn is ut de Wohnstuuv, in de Slaapstuuv gahn is oder gor nich tohuus is, denn krigg ik üm 19.30 op NDR 3 – Hamborg Journal – . Häh, woso? Dat weet ik nich un dat klappt un geiht hüüt jümmers noch so. Dat is echt gediegen.
Ik heff nix maakt. Ja, ja du hest nix maakt, seggt mien Mann. Wo hest du denn al wedder mien dien Griffeln ropdrückt? Ik heff nix maakt, ik swöör. Dat kannst du de Paster vertellen. De Paster? Woso de Paster? Wat hett de dormit to doon?, fraag ik.
So un wenn ik nu nochmal op de Knoop vun de Fernbedenen op 3 drück, denn kümmt al wedder NDR 3 Sleswig – Holsteen – Magazin. Nochmal op de Knoop mit Nummer 3 drücken, denn bliff dat jümmers NDR 3 Sleswig – Holsteen – Magazin. Hamborg – Journal kümmt nie nich wedder.
Annerletzt bün ik laat na Huus kommen un drück op de Fernbedenen mit de Nummer 2. Ik heff noch en poor Saken in de Köök to maken un wunner mi, dat ik son Twüschengesabbel höör. As ik to´n Kiekschapp gah un luster, höör ik dat dor en Fru allens verklookfiedelt, wat de Lüüd dor maakt.
To´n Bispeel: De Fru in Film dreiht de Kopp to Siet oder se nimmt de Tasch vun de Bank un dor fallt ehr dat Verbandtüüg rut…Ik söök nu op de Fernbedenen en Knoop, wo ik dat Twüschengesabbel wedder wegkrieg. Leider find ik nix. So, nu segg ik mien Söhn Bescheed un bidd em üm Hölp. He kiekt sik dat an un fraagt :“ Wie ik dat denn al wedder henkregen heff?“ Ik, wieso ik, ik heff blots op Programm Nummer 2 drückt un denn is de Kiekschapp angahn.“
“So, so du hest doch jichtenswo, op en anner Knoop drückt.“ Nee, heff ik nich, anter ik. Mien Söhn hett en half Stünd de Fehler versöökt to finnen, aver leider dat nich schafft. Denn is mien Mann ut de Slaapstuuv kommen un fraagt, wat is denn hier los? Ik heff em kort vun mien Malöör vertellt un he hett nix beteres to doon, as to fragen :“ Wat hest du denn al wedder maakt? Wo hest du denn al wedder mit dien Griffel op rumdrückt?“ “Ik, ik heff blots op dat 2. Programm vun de Fernbedenen drückt, üm dat antomaken, üm ZDF to kieken.
Mien Mann hett över 1 Stünd versöökt de Fehler to finnen, aver he hett dat ok nich schafft. Achterna seggt mien Mann, in de Kiekschapp maak ik nu de Kinnersekerung rin, so dat du blots vun Klock 8 avends bet Klock 9 avends kieken kannst, un grient dorbi. Nee, nee dat laat mal al na, segg ik un begöscher em, he schall dat Morgen nochmal in Ruh versöken. De Vörslag vun em is, he programeert de Kiekschapp nie, dor bruukt he blots 4 Stünnen to. Dor freut he sik bannig op un maakt een fünsches Gesicht. Dat annere wär, wi koopt uns en nie`e Kiekschapp. Wat, en nie`e Kiekschapp ? Blots wegen de Twüschengesabbel ? Hebbt wi soveel Geld ? Dormit is de Fehler ok nich weg. Nee, dat kümmt gor nich in Fraag. 2 Daag hett dat noch duurt, denn wär dat Twüschengesabbel weg. As ik nafraag, wat he maakt hebbt, hett mien Mann blots smustergrient. He wull mi dat nich vertellen un denn heff ik em ok nich wieder löckert. Wer weet, anner Mal hölpt he mi nich.
Annerletzt wär ik op en Fier un heff dor düsse Geschicht vertellt. Wi hebbt bannig veel lacht un en Fru hett seggt, dat se dat ok op ehr Kiekschapp hatt heff. Dat is de 2 – Kanalton , för Sehbehinderte, dat is een Bildbeschrieven.
So, bruukt de Fru nu ok en nie`e Kiekschapp, as mien Mann meent?
De UKVM 2023
Annerletzt heff ik in mien Goorn en vigeliensch Deel funnen. Dat wär 20 x 20 cm groot, hett 4 Rööd ünner, en Hüüsken op de Rüch mit en Propeller un Antennen dorop. Ik heff mi dat Deel vun allen Sieden ankiekt, bet ik mi truut heff, dat Deel antofaten un neger to bekieken. Een weet ja nich, wat dat is un ob een nich en elektrischen Slag kriggt oder ob dor ob eenmal chemische Gase rutkaamt. Vörsicht is jümmers good. Ik heff dat Deel toeerst in uns Warksteed afstellt un wull later mien Mann fragen, ob he een Ahn hett, wat dat sien schall.
Bi de Goornarbeid heff ik mien Naver dropen un he vertell mi bi een lütten Snack un een Buddel Beer, dat sien Söhn en hochmodern Maschien utklamüüstert hett. Bi den Proovloop is de Maschien leider vun ehrn Weg afkommen un nu verswunnen. Sien Söhn hett veel Geld in dat Projekt rinsteken un neegst Week schall he dat bi sien Firma vörstellen. Nu is dat Malöör groot, wo schall he nu so gau, soveel Geld, Material un Tiet herkreegen üm een niee Maschien to buun. Mien Naver hett mi neeschierig maakt un ik heff denn eerstmal nafraagt, wat dat denn för een Maschien is, wo de utsehn deiht un wat de maakt. Toeerst wull mien Naver dormit nich rut, wiel dat ja noch allens geheem is un egentlich schall de Maschien ja ok bi dat Patentamt anmellt warrn. In de Naverschop könnt se ja nich rümfragen, Plakatte ophangen geiht ok nich, na de Polizei könnt se ok nich gahn. Se dörvt keen Weeswark maken, denn dat is ja allens geheem. Nu is gode Raat düer. Ik heff mi dat allens anhöört un miene Gedanken överto maakt, ob dat sachts en Belohnen gifft. Schall ik em de Maschien, de ik in mien Goorn funnen heff, wedder trüchgeven, as nette Naversch oder schall ik em noch een beten sweten laten, denn he hett ja ok jümmers sien Unkruut, wenn he dacht, ik heff dat nich sehn un mitkreegen bi mi över de Goorntuun smeten. Hmh??? Wat maak ik denn nu ? En Belohnen gifft dat nich hett he mi vertellt. Ik heff mi de Maschien nochmal heel un deel beschreven laten un na een 2. Buddel Beer, heff ik mien Naver seggt, dat ik vördem bi mi in Buschwark en vigeliensch Deel funnen heff. Ut de Warksteed heff ik denn de Maschien hoolt un se mien Naver trüchgeven. He hett sik bannig freut un de Tranen sünd em de Backen hendaal lopen un denn fraagt he mi, wat ik denn mit de Maschien maakt heff, dor fehlen 2 Rööd un 2 Antennen. Ik? Ik heff gor nix mit de Maschien maakt, de is so bi mi in mien Goorn ween. Is dat de Dank, dat ik so ehrlich bün un de Maschien glieks wedder trüchgeven heff? He will nu toeerst sien Söhn anropen un de niee Naricht vertellen. Mal kieken wat dorbi rutsuurt.
4 Weeken heff ik mien Naver nich sehn un höört un denn is he een Namiddag mit sien Söhn to mi röverkommen mit een groten Karton. Wat dor woll binnen is?, heff ik de heele Tiet över nagruvelt. Mien Naver vertellt mi, dat sien Söhn sik bi mi bedanken woll, dat ik de Maschien funnen un trüchgeven heff. Na dat is ja schöön un wat kümmt nu? Se wullen de Maschien bi mi pröven, ob ik dormit inverstahn bün. Wat passeert denn nu in mien Huus? Nee, nich in Huus, bi mi in Goorn schall de Maschien nu wiesen, wat se kann. Dat warr nich leeg, ik warr staunen doröver. Laat di överraschen, seggt mien Naver. Na good, beten Twiefel harr ik, aver ik vertruu em un wi goht na buten.
Sien Söhn treckt an een Seel vun de Maschien un de fleegt nu liesen ca. 10 cm över de Plaastersteen un ut de Hüüsken ward wat spröht. Wat is dat, wat dor rut kümmt, fraag ik em? Geiht dat in dat Grundwater? Nich dat ik naher noch Arger mit de Grönen kreeg, de sünd hier ganz scharp un dat kann ik nich bruken. Nee, nee dat warr allens in Ornen. Na, denn man to un wat schall dat nu, fraag ik em wedder? Ik schall Gedüür hebben, seggt he, sünnerlich mi. Ha,ha. Dat mutt nu över Nacht inwirken un morgen fröh warr ik denn en Wunner beleven. Na wat dat woll sien schall? Is denn mien Opfohrt gröön? Se hebbt mit de Maschien mien heele Opfohrt, ca.100 qm, in 10 Minuten bespröht.
An neegst Morgen wörr mien Opfohrt rein un schier, dor wörr keeneen Unkruut mehr to sehn un ok all de Placken vun de Vagelschiet warr weg. Och, süht dat püük ut un dat allens in so en korte Tiet un ohn to bücken, keen Rüchpien na de Unkruuttrecken. Man dat is ja een dull Deel, de UKVM 2023. Dat wörr de Belohnen, de Dank, dat ik dat Deel trüchgeven heff. Sien Söhn vertell, dat he de Maschien bi dat Patentamt anmellt hett un dat nu allens sienen Weg löppt. As ik fraag, wolang denn nu dat Unkruut weg blifft, seggt he mi, dat de Unkruutvernichtungsmaschien – UKVM 2023 – blots 2x in Johr intosetten is, in Fröhjohr un in Harvst.
Na, ik kiek mi dat ja an, ob dat stimmt, dat glööv ik ja nich glieks. Ansünsten komm ik wedder. Dor maak di mal keen Kopp üm, denn as Dank kümmt de Maschien, 2x in Johr to di röver un ok jümmers dat niee Modell to`n pröven. Na dat is ja toll, nienich wedder Unkruuttrecken, dank de Unkruutsvernichtungsmaschine 2023 vun mien Naver, sien Söhn.
De UKVM 2023 is denn en poor Maand later rutkommen. Se ward in de Buumarkten för 596,20 Euro verköfft. De eerste Serie is leider al utverköfft, aver se könnt sik op de List setten laten. Tööv se nich to lang mit dat överleggen, ansünsten is de 2. serie ok al utverköfft. Denkt se doran, woveel Tiet se sport, keen bücken un Rüchpien mehr. Na, sünd se al op de Weg na de Buumarkt?
