Buntet Programm: Nedderdüütschet Autorendrepen 2026
Literatur, Musik, Mitmaak-Programm un en Podiumsdiskuschoon – dat Programm vun’t Nedderdüütsche Autorendrepen an’n 9. Mai in Mölln weer männichfolig. Bummelig 40 Besöker un 19 Autoren hebbt bi best Wedder dat Programm in Mölln genaten.
Tokumst vun de nedderdüütsche Literatur
v. l. n. r.: Peer-Marten Scheller, Marie Sophie Koop, Heiko Frese un Marcel Jammer (Foto: OK Lübeck)
„Insatz vun Hoochdüütsch in nedderdüütsch Warken: Verlust vun’t kulturelle Arv oder Utwieder vun de Togänglichkeit“ weer düt Johr dat Thema vun de Podiumsdiskuschoon, mit de dat Nedderdüütsche Autorendrepen apen maakt worrn is. Peer-Marten Scheller vun’n Quickborn-Verlag, Heiko Frese vun’n Plaggenhauer Verlag un Marcel Jammer vun de Nedderdüütsche Volksbühn Geesthacht diskereren mit veel Elan. Utgangspunkt weer, dat sünnerlich in de verleden Johren bi de Kinnerböker tweesprakige Böker publizeert worrn sünd. Man ok bi Literatur för wussen Lüüd hett dat jümmers Böker op Hooch- un Plattdüütsch geven. Bi Theaterstücken is dat Ohnsorg-Theater dat beste Bispeel dorför, dat in Stücken ok geern Hoochdüütsch inbunnen warrt. An’t Enn weren sik all Diskuschoonspartners enig, dat de Insatz vun Hoochdüütsch in enigen Fäll Sinn maakt, to’n Bispeel wenn dat üm dat Vermiddeln vun de Spraak an Kinner geiht oder üm Lehrers an dat Inbinnen vun Plattdüütsch in’n Ünnerricht rantoföhren. Dor kann dat denn ok en goden Togewinst sien. En Gefohr vun’n Verlust vun’t Plattdüütsche seht se an düsse Stell nich. Aver an’t Enn mutt de Integratschoon vun’t Hoochdüütsche toalleerst in’t Plattdüütsche Wark passen. Oder üm dat mit de Wöör vun Marcel Jammer to seggen: Kannst maken, muttst aver ok nich.
Literoorsche Veelfoolt
De Autoren un Moderaterschen
Moot, Leevde, Dood un Levensfragen sünd blots en poor vun de Themen, de de Autoren düt Johr mitbröcht hebbt. De Lesens sünd düt Johr ok vun’n Apen Kanal Lübeck optekent worrn. Dorüm kann een de Texten an’t Enn vun düssen Artikel nich blots lesen, sünnern ok anhören un dat natürlich mit de Stimm vun den Autor oder de Autorsche sülvst!
Plattdüütsch speelsch un musikaalsch
Haye & Jan op de Bühn (Foto: Björn Martens)
Man bi dat vele Lesen un Diskereren bruukt een ok mal en Paus. Üm den Uttuusch düt Johr en lütt beten to föddern, geev dat namiddaags en Pub Quiz. Tohoopsmeten Gruppen dörven över all möögliche Quiz-Fragen gruveln. Wat is dat lüttste Land op de Welt? Wo veel Modelscholen geev dat Anfang 2026 in Sleswig-Holsteen? Oder: In wat för en Johr is Klaus Groth boren? Mit veel Spaaß is knovelt worrn. Un achteran is dat denn ok noch musikaalsch worrn. Haye un Jan hebbt mit maritime Musik dat Publikum begeistert un sogor den een oder anner to en Solo beweegt. An’t Enn blifft blots to seggen: Wi freit uns op dat Neddderdüütsche Autorendrepen 2027!
De Texten to’t Nalesen un Anhören
Hier könnt ji/Se de Texten vun uns Schrieverslüüd nalesen. Eenfach op de Fotos klicken. Veel Vergnögen bi de Lektüre wünscht dat Nedderdüütschzentrum Holsteen!
