En Kinnerstadt in Mölln
Tillhausen/Mölln. Een Stadt, in de Kinner seggen dörvt, wo dat langs geiht? De gifft dat, organiseert vun’n Kreisjugendring Hertogdom Loonborg e.V. all twee Johr in Mölln. För teihn Daag treckt 300 Kinner twüschen acht un veerteihn Johr ut’n Kreis Hertogdom Loonborg un Polen in en Teltstadt ründ üm’t Luisenbad. Jüst so as in en richtige Stadt gifft dat hier ok en Kark, en Postamt, en Bank, en Klinik un en Arbeitsamt. Ok en egen Geldsoort hebbt de Inwahners: den Tilltaler un Tillkreuzer. Mit de köönt de Kinner in Tillhausen sülvstmaakt Produkten köpen. Man üm Geld utgeven to könen, mutt dat verdeent warrn. Dörför köönt de Kinner to’t Arbeitsamt gahn. 46 verscheden Jobs vun Deertenpleger över Automechaniker bet hen to Fernsehreporter stünnen düt Johr to Utwahl.
Plattdüütschet Jobanbott bi Tillhausen
Foto: Kreisjugendring Herzogtum Lauenburg e.V.
Arbeit an den Moderatschoonstext
To’n eersten Maal geev dat ok en Anbott op Plattdüütsch. Dat Zentrum för Nedderdüütsch weer mit en Radioanbott mit dorbi. Stütt geven hebbt Inge Pusback, Plattdüütbeopdraagte vun Mölln un en engageerte Teamassistentin. Jeedeen Vörmiddag kunnen Kinner twee Stünnen lang an en hooch- un plattdüütsche Radiosennen arbeiden. De Kinner hebbt Interviews föhrt, to’n Bispeel mit den fröheren Landdagspräsidenten Klaus Schlie oder Gerd Lüttge, den Börgermeester vun Bookhorst. Se hebbt Bidrääg produzeert un lütte Ümfragen maakt. Dat Thema vun de Sennen weer: Demokratie. Anleidt worrn, sünd de Kinner – je na Weten vun’t Plattdüütsche – op Hooch- un Plattdüütsch. De mehrsten Kinner harrn vördem wenig bet gor keen Kontakt to de plattdüütsche Spraak. Se weren aver apen för de Spraak un hebbt se ok sülvst anwennt. Dat Resultat lett sik sehn: Na de teihn Daag is en Sennen vun 30 Minuten tosamenkamen un insgesamt hebbt 33 Kinner twüschen acht un 14 Johr an de Sennen mitarbeidt un se ok insnackt. De fardige Sennen weer an’n 18. Juli bi’n Apen Kanal Lübeck Klock dree to hören.
De Sennen „Plattradio Tillhausen“ to’t Nahören:
Foto: Kreisjugendring Herzogtum Lauenburg e.V.
De Moderatschoon för de Sennen warrt insnackt
Plattdüütschet Krimi-Höörspeel in dree Delen
