„PLATT FÖR HÜÜT UN MORGEN“, NEDDERDÜÜTSCH AUTORENDREPEN 2023
Behrend Böckmann
Dat niege Schaulcurriculum
Ein Schaulmeister dei gor nich dumm
Drömt von dat nie Curriculum,
Un man künn åhn Œwerleggen
Glattwech Lihrplan dortau seggen.
So as dat wier all bi dei Ollen,
Ward Läsen, Schrieben bibehollen,
Denn Läsen, wat ’n Amt so schrifft,
Un woans man Antwurt gifft,
Dat ward denn Minschen männig Dåch
Noch mihr as blot ’n grote Plåch.
Bi Utdruck kümmt’t up Wür blot an,
Mit dei man üm sik schmieten kann.
Dorbi möt man gor nich weiten,
Wat denn „dezidiert“ deit heiten,
Wat sukzessiv wür eroiert,
För weck’ Opschon dei Minsch votiert.
In Utdruck kümmt dat blot up an,
Dat man väl Teiken düden kann,
Dormit Verstännigung denn geiht,
Wenn man denn Finger wiesen deit,
Orrer ein Bewerbung schrifft
Un sik as klauk un plietsch utgifft.
As Tausatz man noch wählen kann,
Woans man lecht sien „Facebook“ an,
Un „simsen“ steiht bald an’e Stell
Von’n Appelschuß ut „Willem Tell“.
Ok för denn niegen Räkenplån
Ward so allerlei denn dån,
Un dor dei Kopp för’t Räken schwach
Un kein Minsch mihr räken mach,
Kriecht jederein åhn grot Gewäs’
För denn Brägen sien Prothäs’,
Un alle Minschen finnen’s fien,
Disse lütte Räkenmaschin’.
Man tippt blot Knöp un kriecht fix rut
Wat måkt an’n Dach dei „Stütze“ ut,
Wurväl kann dei Minsch utgäben,
Wenn hei möt as Hartzer läben,
Un wat son’n Minsch verdeinen kann,
Wenn hei denn wier ’n Supermann.
In Ethik orrer Lebenskunn’
Måkt nieger Stoff ok siene Runn’:
Man lihrnt, dat man sik „auten“ deit,
Dormit denn alle Welt ok weit:
Ik bün anners as dei annern,
Bün gägen’t Auto, bün för’t Wannern.
Man lihrnt, wat man denn Richter secht,
Wenn man hett bråken gellend Recht,
Woans man tau sik sülben finnt,
Un’t Komasupen œwerwinnt,
Wat passiert, wenn man mål kifft,
Un wat dat denn dorgägen gifft.
In Bio sünd Planten tabu
Bet up Hanf un denn Anbu,
Ganz geheim in lütt Plantagen,
Gaut verstäkt in oll Garagen.
Un wat schlöcht ierst dat Schäukerhart
Wenn ut’n Kierl ’ne Fru denn ward,
Wenn dei Paul ward Paula heiten,
Un sei kriegen ok tau weiten,
Ob dei in’n Fru ümwannelt Mann
Noch Safersex beläben kann.
Ok dat väle vörkåkt Äten
Ward in Bio nich vergäten.
So sall dei lütte Minsch erfohren,
Dat hei all in jungen Johren
Von Adipositas ward quält,
Wenn denn Lief Bewägung fählt.
Dörch Physik kriecht man bald rut
Woans man häbelt Finster ut,
In wat denn dat Geheimnis licht,
Wenn man dörch tauig Dören sticht,
Woans man einen so afknallt,
Dat dat gor kein bäten schallt.
Man lihrnt nich väl von dat Atom
Un ok nich väl von niegen Strom,
Doch lihrt man von elektrisch Såken
Woans man mœt ’n Kortschluss måken.
Denn wenn dei plietsche Muser weit,
Woans dat mit denn Kortschluss geiht,
Möt hei sik nich so afplacken,
Wenn hei will ’nen Wågen knacken.
Solt an schellte Tüffeln gäben
Wier Chemie in Größings Läben.
Hüt is sik männig Minsch nich wiß,
Wat ’n Element wull is:
Is dat Iesen, is dat Wåder
Orrer Blaut in siene Åder?
Dat Flammen brennend Gase sünd,
dat wüsst vör Tieden jedet Kind.
Doch Füer dat is billungsfiern,
Annern Stoff harr man hüt giern,
Lihren sall’n dei Kinner hüt
Wat man af un an so süht:
Man knallt ’n Buddel an ein Wand
Un gliek steiht dat Hus in Brand!
Dor man Sprit nich drinken sall,
Behannelt man up jeden Fall,
Woans in Gärung wat ward bröcht
Dormit sik dat in Kœm ümschlöcht,
Un man dat destillieren deit,
Von dat dei Würkung denn utgeiht.
Schäulers ward ok anvertruucht
Woans man Trånengas sik bruucht,
Woans man mit por Druppen Brom
Sik erfüllt so männig Drom.
Ok dei Ierdkunn’ hett sik wannelt,
Denn dei Stoff, dei dor behannelt,
Is nich uns Eld’ un Mildenitz,
Is nich dat fierne Lüderitz,
Nich Dütsch-Samoa 1900,
Ne, in Ierdkunn dor ward wunnert
Œwer Länner dei dat gifft,
In dei dat Islamisten drifft,
Wo sei lihrn denn sotauseggen
Woans man mœt denn Bomben leggen.
Sünd wecker ut’e Oort dull schlåhn,
Warden’s ok up Reisen gåhn,
Warden sik dorhen begäben,
Wo’s ehr Bät’rung sall’n beläben.
Mit ’nen Päting reisen’s denn
Tauierst eins nå Alaska hen,
Un ok ganz hinnen in Sibirien
Måken sei Beläwnis-Ferien.
Un wenn dat gor nich helpen deit,
Denn’t af nå Madagaskar geiht,
Beläwt denn Knast up’t Sägelschipp
As kostenlosen Weltentripp.
Geschicht fangt bald mit Eva an,
Dornah kam’n anner Frugens ran:
Dei tweit, dor bün ik mi all wiß
Dei Königin von Saba is.
Ok Nofretete ward nich fählen,
Mit Salome ward man sik quälen,
Lihrn, wat dei Borgia hett dån
Un woans dat Sisi is ergåhn,
Dat in London läwt dei Queen
Un Kanzlersch Angy in Berlin.
Frugens, dei Geschicht hemm’ schräben
Sall’n denn Ünnerricht beläben.
Dees Oort Geschicht kann man ok låten
Un sik dorför mit Kunst befåten,
Kann denn Lihrer düchtig brüden,
Wenn man deit denn Biller düden:
Up wecken Infall mœt’n kåmen,
Tau düden in denn witten Råhmen
’N blågen Punkt, doch nich ganz rund,
In’e Eck von’n gälen Grund?
Un sünd twei Strichen as ’n Läus
Nich ’n Bild von Joseph Beuys?
Mœten Schäulers würklich weiten,
Woans dei välen Målers heiten,
Dei eins läwten in Worpswäd’,
Von dei noch hüt is oft dei Räd?
Die Schäuler sall hüt glücklich läben,
Von Båben ward em nicks vörgäben,
Hei sall doch tau sik sülben finnen
Un dorüm ok allein bestimmen.
Ja, Lust un Freud an jeden dach
Jedet Schäulerhart giern mach,
Un ik gåh in up jede Wett,
Dat hei ok Lust up Fulheit hett.
