Geesthacht – En Wahnstuuv, blots een Couchdisch, Sofa un een Stohl staht dor. De Deelnehmers vun’n Workshop „Schauspelen – op Platt?!“ warrt vun Liddmaten vun de Nedderdüütsche Volksbühn Geestacht dörch de Theaterwarksteed föhrt. In de Theaterwakrsteed proovt sünst dat Ensemble vun de Nedderdüütsche Volksbühn. Een Ruum wieder geiht dat dörch de Utstatten – Stöhl, Dischen, een Trepp – allens wat een so op de Bühn bruken kann, is hier to finnen. Man sünnerlich een anner Ruum interesseert de Deelnehmers: de Kostümfundus. Hööd, Mantels, Kleeder, allens na wat dat Hart so lengen kann, is hier to sehn. Na den lütten Rundgang kümmt de Arbeit. De Workshopdeelnehmers warrt in twee Gruppen opdeelt un leest tohoop lütte Sketchen. Woans se de Wöör betoont un utsnackt, verkloort je een Regisseur oder Regisseursche vun de Nedderdüütsche Volksbühn Geestacht. Dorna fangt se an, den Sketch in Bewegen to proven. In de Tiet warrt buten al de Grill ansmeten, denn na dat Proven hebbt al liekers dat dat 39 Grad sünd, Smacht. Na de Paus warrt de Sketchen noch mal opfrischt. Un denn heet dat: Vörhang op! En kaputte Schrievmaschien, de heel maakt warrn schall un een Reparateuer, de dat Problem nich versteiht un lever en Laptop verköpen will oder een Mann, de vun‘n Doktor behannelt warrn will, wiel he vun’n Hund beten worrn is, bringt veel Kuddelmuddel op de Bühn. De Deelnehmers un Deelnehmerschen hebbt veel Spaaß hatt un wünscht sik den Workshop ok för tokamen Johr. Dree vun de Deelnehmers warrt nu noch een ne’en Sketch inöven, den se denn an’n 20. August to de Kulturnacht in Geesthacht opföhren warrt.
Plattdüütsche Radiosennen bi Tillhausen
