Vun’n 3. bet 11. Oktober 2026 is Plattdüütsche Week in’n Kreis Rendsborg-Eckernföör. Ünner dat Motto “Rut mit de Spraak!” köönt Lütt un Groot, Anfängers un Kenners beleven, wo riek un bunt de Spraak un Kultur in de Region is.
Düchtige Mitstrieders mit Drift för Platt wiest vun Fleckeby bet Bosholm, vun Hanerau-Hamarschen bet Olenholt, wat op Platt allens geiht: Vun Spraakkursen un Gottsdeensten, Lesens un Konzerten, mitenanner singen un klönen, sik wat anhören un mitmaken, Föhren in de Stadt un dörch de Landschop bet to Film oder Theater kieken – is dat nich dull?
Wokeen, wat, wo?
Dat sünd Scholen un Museen, Verenen un Verbänn, enkelte Lüüd un Institutschonen, de sik bannig wat infallen laten hebbt un mit groten Insatz düsse Week füllt. Dat lohnt sik un kiekt tiedig op de Anbotten, för enige Veranstalten deit sik anmellen nödig un de Tall an Mitmakers hett en Grenz. Dat geiht online mit Klick hier op dat Programm to’n Blädern. Een kann sik ok dat Programm hier daalladen. Un wenn een geern Druckwark in de Hand hett, gifft bi uns Bescheed, denn schickt wi dat to.
Opmaken mit Godewind
För den Optakt vun de Plattdüütsche Week köönt wi to wat ganz Besünners inladen: Wi fiert tosamen mit de Servicesteed Kulturelle Integration vun de VHS Rendsburger Ring e.V. opto den Afsluss vun de Interkulturellen Weken, den Dag vun de Düütsche Eenheit un dat Jubiläum 80 Johr Sleswig-Holsteen. An’n 3. Oktober 2026 gifft dat twüschen Klock 10:00 un 17:00 in’t Hohe Arsenal in Rendsborg en feinet Programm. Klock 14:00 maakt uns Schirmherrin, Kreispräsidentin Sabine Mues, denn de Plattdüütsche Week op. Denn gifft dat Musik vun de Band „Godewind“ un Snack mit vele röhrige Akteuren ut de Week. Dorbi sien kost nix, een mutt sik blots geern bet 23. September anmellen. Dat geiht över düssen Link för mehr Infos un Anmellen, oder man kann sik de Inladen daalladen, utfüllen un uns tokamen laten.
Groten Dank vun’t Orga-Team
Ahn de grootoordigen Ünnerstütters, harrn de beiden Zentren för Nedderdüütsch in Sleswig un Holsteen dat allens nie nich torechtkregen. Dorför seggt wi vun Harten Dank an den Kreis Rendsborg-Eckernföör un an sien Kulturstiften, jüst so an de veer Genossenschaftsbanken ut den Kreis. Groten Dank seggt wi evenso an all Lüüd un Institutschonen, de wat mit jümehr kreativen un so verscheden Anbotten dorto bidregen, dat wi en plattpralle Programm präsenteren köönt un de mit jümehr Ideen un Insatz wiest, wo bunt un riek uns gemeensamet Arv is.
Schauspeelworkshop bi de Nedderdüütsche Volksbühn Geestacht
