Wat is egentlich en „Bodderlicker”? Un wat för Büdels gifft dat, blangen den Schietbüüdel, noch in’t Plattdüütsche? Wokeen an’n Sünndag, 16. Juni, bi’n Dag vun de apen Döör in’n Kieler Landdag an de Stänn vun de twee Zentren för Nedderdüütsch in Sleswig-Holsteen vörbikeem, kunn dat un noch männich wat anners lehren. An düssen Dag stell sik dat Parlament vör. All Parteien harrn ehr Stännen ünnen in’t Foyer opbuut un meist all Dören weren tatsächlich apen. Sogor in den Plenarsaal un in de Amtsstuuv vun den Parlamentspräsident kunn een de Nees rinschuven un sik en Platz utsöken.
Mehr as 20.000 Lüüd harren den Weg to’t Lanneshuus an’e Kieler Föör funnen, üm nich blot mit Politikers to snacken oder sik över de Gesetzgeven to informeeren, man ok üm sik antokieken, wat de Zentren för Nedderdüütsch in Mölln un Leck so maakt. Se weren in’t eerste Stockwark in’n Sleswig-Holsteen-Saal ünnerbröcht. Un dat Interesse an ehre Arbeit weer groot. So harren Thorsten Börnsen un Ronja Kilian vun’t Möllner Zentrum un Gesa Retzlaff, Anna Lehmann un Malene Gottburgsen ut Leck (up’t Foto baben vun links na rechts) veel to doon mit’t Snacken vun un över Platt. Un de Lüü, de se besöökt hebbt, weet nu hoffentlich all, dat en „Bodderlicker” en Sommerlott is. Dat heet: en Fleerling. Een kann ok „Boddervagel” seggen. Oder op Hoochdüütsch: Schmetterling.
-
- Thorsten Börnsen achter’n Böökerdisch vun’t Zentrum
-
- Ronja Kilian an’n Stand vun’t Zentrum
-
- Een kunn ok en Plattdüütsch-Quiz maaken
