NEDDERDÜÜTSCH AUTORENDREPEN 2026
Hans-Werner Grave
Sülvfluencer
„Weetst wat: Wi warrt nu bald en Sülvfluencer!“
„En wat?“
„En Sülvfluencer! Dat is en Woortspill to sülvern un influencer, dat engelsch Woort för een, de annern övertügen will!“
„Övertügen? Vun wat?“
„Oh man! Is doch kloor, kannst annern man blots vun dat övertügen, wovun du sülvst övertüügt büst!“
„Tilly, nu warrst du ja woll mall, wokeen hett di düsse Grappen in‘n Kopp sett? Na, kann ik mi al denken, uns Enkeldochter Tilly!“
„Max, uns Enkeldochter heet Mathilde, un mit ehr achtteihn Johr leggt se Weert dorop, dat se so nöömt warrt!“
„Enerlei, de leevt liekers in ehr egen Welt, de keeneen mehr versteiht!“
„Oder nich verstahn will, segg man lever un faat di an dien egen Nees. Du geihst ehr ut den Weg un wunnerst di, wenn se sik vun di afwennt. . .! To Wiehnachten harr se di en Handbook för’t Internet schenkt. Ik vermood, du hest noch keenmal rinkeken, oder? Aver nu kiekt wi beid mal rin, laten uns allns nipp un nau verklooren un gaht as Sülvfluencer mit en Podcast in´t Nett.”
„En wat?“
„Oh man, en Podcast is dat, wat een in’t Net stelln oder dalladen kann!“
„Nu warrt doch de Katt in de Pann verrückt. Bedüüdt dat villicht, dat wi beid dor rumschafutern, wo de jungen Lüüd hüüttodaags afhangt?“
„Ja, kann ween, dat wi nu bald op een vun de Kanals to sehn sünd, de Mathilde mi verkloort hett: Facebook, WhatsApp, YouTube, Instagram, Tiktok, WeChat, Telegram, Messanger…“
„Nööm dat as du wullt! Dat is so un so nix anners as dumm Tüüch!“
„Wieldat du nix anners weetst as dat, wat du weten wullt un di denn wunnerst, dat du tüdelig in‘n Kopp un klapperig op de Been warrst un nich markst, dat du dat Verbinnen to de junge Lüüd verleerst, ahn dat du dorum wies warrst. Wi beid schullen uns aver vörnehmen, mit Lief un Seel in Bewegen to blieven un dat Verbinnen to uns Kinner nicht to verleren! Mathilde wöör uns dorbi to Hand gahn. Se stellt jüst en nie‘e Podcast vun sik in‘t Nett! Uns Enkeldochter hett mi dorvun övertüügt, dat vele Lüüd jümehr egen Ruum bruukt, um sik mittodelen! Un denn laadt se sik en Podcast ut dat Nett dal. Kannst ok seggen,se ‚streamen‘!”
„Un meent Tüdelkraam!“
„Ne, meent dat nich! Un nochmal to‘n Mitschrieven: Dat mit de Sülvfluencer harr ik di al verkloort. En Podcast is dat, wat een in‘t Nett stellt un annern sik dalladen köönt, wat ‚streamen‘ meent. Versteihst so un so eerst, wenn du di dormit en beten mehr afgiffst! Mathilde meent, dat se sik mal um sowat as en Podcast för uns beid as de sülvern Generatschoon bemöhen will un hett vörslagen, dat wi uns vörher wedder in‘t Danzen un Schachspelen öven schullen!“
„Danzen un Schachspelen? Klingt nich slecht! Sprickt Liev un Seel togliek an, un beides hebbt wi al jümmers henkregen!“
„Segg ik doch! Un nu laat uns man nich so lang spekuleren, sünnern glieks losleggen. De Danzmusik hett Mathilde al ut dat Nett streamt un op mien Wiesfeller installeert. Bi‘t Schachspelen kann di so un so keeneen wat vörmaken. Hebbt wi beid uns nich mal bi‘t Schachspelen kennenlehrt un sünd uns dorna bi‘t Danzen neger kamen? Allens anner leggt wi nu in Mathildes Hannen. De warrt denn mit uns ehren Podcast maken. Mathilde hett ok al en Naam dorför vörslagen: ‚Silvfluencers-chess-dancing‘. Un för uns Schachspill tovör hett se sik wat to‘n Smüüstern utdacht: En Meme!“
„En wat ?“
„Oh man!!!“