NEDDERDÜÜTSCH AUTORENDREPEN 2026
Horst Jürgens
Anglers
Wat mien Broder sien Fründ Erwin is, de hett dat mit de Angelee. Un vör veer Weken hett he mi denn mitsnackt na een Drepen vun sien Angelvereen, wo he in`n Vörstand sitten deit. Junge, ik heff gor nich weten, dat`t in uns Gegend so vele Anglers geven deit un dat sünd nich bloots ole Rentners. Ne, `n ganz Deel junge Keerls seten dor un för jem geev dat sowat as Ünnerricht; se wullen doch de Angelprüfung afleggen, kreeg ik vun jem to weten. Harr ik vörher nich wußt, dat`n sowat hebben mutt bevör`n de Hunger-pietsche in`t Water smieten draff. Ik harr jümmer dacht, wenn`n in een Angelvereen is, denn kunn`n överall in angeln, egaal wo groot dat Waterlock is un ganz egaal wo dat liggen deit. Ne, heff ik to hören kregen, Angelschien mutt ween un dat Water, wo`n in angeln draff, mutt de Vereen vun den, den dat tohören deit, extra pachten or köpen. Ut düssen Grund sünd ook de Bidrääg in so`n Angelvereen ganz schöön happig.-
Ja un na den „offiziellen“ Deel vun dat Drepen güng`t denn eerst richtig loos. Een vun de Angelkeerls hett `n sülmsdreihten Film vörzeigt, över siene Angeltuur in Kanada. Vun dat Anglerkauderwelsch, wat he dorto vertellt hett, heff ik bloots mitkregen: Köderflegen un Lachse! Un sehn heff ik em jümmer bloots in siene Gummibüxen bit an`n Buuk in`n Water stahn un as dull mit de Angel hanteern. Hen un her hett he de Angelsnoor smeten. Un wöör se denn endlich in`t Water induukt, hett he foorts an de Kurbel an siene Angel dreiht un de Snoor flink wedder ut`n Water rutreten. „Na“, heff ik to den Angelkeerl neven mi seggt, „so kunn dat ja nix weern, `n beten Tiet to`n Anbieten mutt`n de Fische doch laten un nich jümmer gliek as dull an de Kurbel dreihen.“ „Ne, ne“, hett de Keerl neven mi dor seggt un mi vun baven bit ünnen mustert, „dat mutt so ween, Flegenfischen op Lachse is hööchste Angel-kunst. Un Kurbel heet dat al gor nich, dat is de Rull, an de he an dreiht hett!“-
Seggt heff ik an den Avend nix mehr; ook nich, as to sehn wöör, dat de Flegenfischer doch tatsächlich een vun de Lachse fungen un em op de Stee afmurkst hett. Keene dree Minuten later harr he den Fisch fileteert, dreeveertel vun em in`t Water trüchsmeten un de Filets inpackt in de Köhlbox, de he mitbröcht harr. Na, heff ik bi mi dacht, de Fische afmurksen un opsnien geiht em wull lichter vun de Hand, as dat Angeln. Seggt heff ik dat aver nich; ik wull mi doch nich nochmal scheef ankieken laten.
As`n sik denken kunn is`t för mi bi dat eene Anglerdrepen bleven; Angeln is nix för mi! De velen Angelscharteken, de een hebben mutt, de Angelschien, den`n maken mutt, de Bidrääg in den Vereen un för so`n Lachs de wiete Tuur na Kanada, kummt mi allens veel to düür. Veel eenfacher un `n ganz Deel billiger kunn ik em bi Aldi kriegen un in Schieven sneern is he ook al! Un he smeckt nich slecht, hebbt de Lüüd seggt. Denn ik, ik weet dat ja nich; ik mag doch gor keen Fisch!