An enige Scholen in Sleswig-Holsteen gifft dat Plattdüütsch-AGs, so ok an de „Dörfergemeinschaftsschule am Struckteich“ in Zarpen in’n Kreis Stormarn. Tanja Schiprowski kümmert sik dor üm de AGs un hett düt Johr mit de „Plietsche Plattschnacker“ en heel besünner Projekt ümsett. In en lütt Interview vertellt se vun de Arbeit in de AG
Marie Sophie Koop: Tanja, Du büst an de Grundschool in Zarpen Lehrersche un hest dor ok en Plattdüütsch-AG. Woans büst Du op de Idee kamen, de AG intorichten?
Tanja Schiprowski: Wi sünd siet 2014 Plattdüütsch Modellschool – un ok davör hebbt wi al Plattdüütsch AGs hett. Dat hett bi us Traditschoon. Fröher hebbt wi jümmers een AG Klass 1/2 un een 3/4 hatt, nu hebbt wi dat in Kass 1 un 2 in’n Ünnerricht integreert, un nun hebbt wi noch een AG in Klass 3/4. De Grupp, mit de ik den Kalenner maakt heff, is aver een Grupp, de sik siet 2020 drippt. Dormals weren se in de föffte un sösste Klass, se hebbt bi us Plattdüütsch lehrt un an ehre nie’e School geev dat keen Anbott. Wi hebbt us denn in Corona-Tieden in Videokonferenzen drepen un dorna wedder in „Echt“. Denn hebbt wi Stücken leest, un eerste Sketchen öövt. 2023 un 2024 hebbt wi Theater speelt. „De flegende Klassenstuuv“ un „Kalle Blomquist“ as avendfüllene Stücken – dat weer bannig opregen.
Marie Sophie Koop: Wat för Projekten beschickt ji in de Plattdüütsch-AG?
Tanja Schiprowski: Mit de AG Klass 3/4 hebbt wi een lüttet Stück entwickelt, wat de Kinner sik sülvst utdacht hebbt, „Dat Wiehnachtsaventüer“. Dat is 10 – 15 Minuten lang un dat warrt wi op us Wiehnachtsfier in de School opföhren. Dortau sünd wi ok inlaadt, bi Adventscafés vun de Dörper optoföhren. Dat maakt wi ok geern.
Marie Sophie Koop: Düt Johr hebbt ji jo en besünneret Projekt för de Wiehnachtstiet överleggt. Ji hebbt en Adventskalenner maakt. Woans sünd ji op de Idee dorto kamen?
Tanja Schiprowski: De Idee keem mi letzte Wiehnachten – dor hett de Kark in Hilligenhaven, wo mien Mudder wahnt, so wat liektet mit Videos vun Leder un Klaveer un so wieder maakt. Den Adventskalenner heff ik ja mit de anner Grupp maakt, de sik „Plietsche Plattschnacker“ nöömt un de intwüschen in de 7. – 12. Klass op verschedene Scholen gaht. Na de groten Theaterstücken hebbt enige ophöört un de Grupp warrt lütter. Un ok de hebbt nich mehr so veel Tiet. De een maakt Föhrerschien, de anner hebbt Konfermatschoonsünnerricht un so wieder. So bruuken wi een Projekt, wobi een sik nich jede Week drepen mutt. Un dat güng bi düt Projekt besünners goot.
Marie Sophie Koop: Wat is dat Besünnere an den Adventskalenner?
Tanja Schiprowski: Dat een achter de Dören QR-Codes hett. Wenn een de scannt, gifft dat Leder, Sketchen un Texten to hören, de wi inleest hebbt.
Marie Sophie Koop: Woans seeg de Arbeit an den Kalenner in de AG-Tiet ut?
Tanja Schiprowski: Wi hebbt in’t Fröhjohr anfungen, Texte to finnen, de Autoren antoschrieven, of wi de Texten ok verapentlichen dörpen. Kort vör de Summerferien harrn wi noog tosamen. Wi hebbt us noch veer Sketchen utdacht. För dat Lesenöven bruken wi us nich jede Week drepen – dat weer een Vördeel. An’n 26.9. hebbt wi de Texten denn bi’n Apen Kanal in Lübeek inleest, dormit dat denn ok en gode Höörqualität hett. Twee befrünnte Musikers stüern noch dree Leder bi un vun den Pastor ut Zarpen kemen so smucke Biller vun de Kark för dat Titelbild. Een beten Arbeit weer noch de 24 Dateien in QR-Codes ümtowanneln un so aftospiekern, dat dat ok geiht, dat de Kalennerhörers dat denn ok hören köönt. Dorbi kunnen de jungen Lüüd bannig hölpen. En Druckvörlaag müss erstellt warrn un denn güng dat in’n Druck. An’t Enn weer dat noch opregen, of dat allens so klappen dee. Mit dat Resultat weren wi denn aver sehr tofreden.
Marie Sophie Koop: Wat för Planen gifft dat för de Tokumnst in de Platt-AG?
Tanja Schiprowski: Dat weet wi noch nich. Schöön weer mit de Lütten ok mal wedder so wat as een Höörspeel oder een plattdüütschen Dörprundgang mit sülvst schreven Texten to maken, so wat villicht. So wat entwickelt sik meist nah un nah.
Foto: Tanja Schiprowski
Plattdüütsche Week in RD-ECK – Programm is rut
