NEDDERDÜÜTSCH AUTORENDREPEN 2025
Ingrid Schulze
De Orgeln un de Karken
Dat is doch nich to glöven, wat dat för Wunnerwarke an Orgeln un Karken in Norddüüschland, besünners in Schleswig-Holsteen geven deiht. En Tante von mi keem ur Eiderstedt an de Westküst, Tetenbüll heet dat Dörp. Vör twee Johr sind mien Vetter un ik ob de Idee kamen, de Karken un Orgeln in Eiderstedt to bekieken. To veert sind wi losföhrt. In Kotzenbüll sind wi anfungen, aver de Kark weer total buufällig. Grote Balken hemm dat Innenleben von de Kark stützt. Na den ersten Schock weern de annern Karken un Orgeln aver in een goten Tostand. De Dörn weern överall apen. In Katharinrnheerd sind de Öllern von mien Vetter truut woorn. De meisten Karken sind ut roten Backsteen un de Bumeister hebbt sik örnlich wat infallen laten, een Kark schöner as de annere. De Orgeln sind reine Wunnerwarke un de Orgelbuuer Magnussen ut Apenrade hüt een Ohrwurm. En Arb Schnittker Orgel is ob Pellworm in de ole Kark to finnen. Dor will ik mit mien Süster en Orgelkonzert in de Sommertied anhörn, dor freu ik mi nu schon ob. In unse Hartogtum Lauenburg hebbt wi ok so wunnerbore Karken un Orgeln. De Karken sind öft mit Felsensteen buut, so as in Sterly, Gudow un op den St. Georgsbarg in Ratzborg. En kann gor nich överall henngahn. An mehrsten bewunner ik de Organisten, de ob de Orgeln speelen doon. Mit Hannen un Fööt möten se sik betätigen un ok noch de richtigen Register trecken. Dree Dome könen wi in Schleswig-Holsteen ok vörwiesen. In Meldörp, in Schleswig un unse wunnerbore Dom in Ratzeburg. Hier hett de Fa. Rieger 1978 en ganz nüe Orgel inbuut. Neithart Bethke weer dor de Organist. Bi siene sülvst komponeerten Stücke müß man sik bald de Ohrn tohalen, so luut hett he de Orgelfleuten un Pedalen betätigt. Unse jetzige Organist hett vör alle Ohrn watt dorbi, ok mit Domchor. De Paradiesorgel in de Vörhalle von den Dom is nü restaureert woorn. Dor kann en kieken, wi de Organist mit de Hannen un Fööt sik betätigen deiht. Dor gehört schon Begabung un Öbung dorto. De lüttste Orgel heff ik in Lassahn seen, in de St. Abundus-Kark ut Felsensteen. Dat is een Furtwängler Orgel, 1902 in Hannover buut woorn. In Lassahn heff ik de Organistin fragt, ob ik door mool speelen durf. Se nickköpt. Se hett de Register trucken un ik heff speelt: Ik bet an de Macht von de Leev, een grototiget Geföhl. Un wer mach, kann sik bestimmt veele Orgelkonzerte in unse Karken anhörn un beleven.