hören
“Dat Aventüer in de Ünnerwelt”
Foto: NDR
Leyla finnt nachts geheme Ünnerlagen op den Schrievdisch vun ehren Vadder: en Kluft in’n Bodden is apengahn! Merrn in de Nacht geiht dat af: Leyla un ehre Frünnen lannt in de Ünnerwelt. Dor draapt se mystische Figuren. Avers kann een en Skelettdaam truen? Woans överdüvelt een en Zentaur oder den Kerberos? Un schull een versöken, na dat Paradies Elysion to kamen? Üm dat allens dreiht sik dat NDR-Höörspeel „Dat Aventüer in de Ünnerwelt“.
Plattdüütsch in’t modern Kleed
Volker Thormählen, NDR-Direktor vun’t Lannsfunkhuus Sleswig-Holsteen, verkloort, dat in’t eerste interaktive Kinnerhöörspeel op Platt veel Kreativität, Arbeit un Liedenschop vun de Kollegschen un Kollegen steckt. Dat ne’e Anbott is en Paradebispeel för en modern un in uns Tiet passen Anbott in de Regionalspraak. Gliekstiedig is ok op Nahaltigkeit sett worrn, denn dat Höörspeel kann över vele Johren henweg höört warrn, dor dat mit de Tiet nich an Relevanz verleert.
Interakschoon mit’t Publikum
De eersten 41 Sekunnen vun’t Höörspeel swöört den Tohörer al in: en verloren Knaken un en vergrellten Dodengott – Spannen pur. Helge Albrecht, de tohoop mit Lornz Lorenzen dat Höörspeel vun Lisa Krumme in’t Plattdüütsche överdragen hett, föhrt as Host dörch dat Höörspeel. „Du hest hier en wichtige Opgaav – egentlich de Wichtigste wörr ik seggen. Entscheeden, woans de Geschicht wiedergeiht“, verkloort he. Wenn een dat Höörspeel anhöört, kann een nämlich jümmers twüschen twee Opschonen wählen, woans dat Höörspiel wiedergahn schall. Somit bestimmt de Tohörer den Verloop vun’t Höörspeel.
Höörspeel ne’e denken
Mit de Interaktivität dörchbrickt dat Höörspeel de 4. Wand hen to’t Publikum. Dat Produkt wiest, dat Plattdüütsch nich verstüfft, sünnern ok för moderne Medienformen eignet is. Bi den ne’e utlöövten Översetter-Pries „Hartmut-Cyriacks-Pries“ is dat Höörspeel 2026 mit den 3. Platz uttekent worrn. De dree Hööfrullen snackt Ida Hansen (13), Jette Kuschner (11) un Lutz Philipp Graf (12) ut Sleswig-Holsteen, de all mit Plattdüütsch opwussen sünd. Ok to hören sünd Nele Larsen, Konstantin Graudus, Peter Kaempfe, Erkki Hopf un Ole Schloßhauer, de all al an’t Ohnsorg-Theater speelt hebbt.
Hier gifft dat dat Höörspeel to’t Anhören.