Foto: Sabine Riege
Meist all Autoren, de leest hebbt tosamen mit Ingrid Bindzus (Kreisplattdüütschbeopdragte) un Marie Sophie Koop (Leidersche ZfN)
Nadem dat in de verleden Johr eerst dörch de Corona-Tiet un denn dörch de fre’e Steed bi’t Zentrum för Nedderdüütsch in Holsteen (ZfN) blots unregelmatig dat Nedderdüütsche Autorendrepen geev, is an’n 10. Mai 2025 dat Autorendrepen wedder ut’n Doornrööskenslaap opweckt worrn. In’n Stadthöfftmannshoff bi de Stiften Hertogdom Loonborg, de siet Enn vun 2024 de Dregerschop vun’t ZfN övernahmen hett, harrn sik Autoren in’t Vörfeld beworven, üm bi’t Autorendrepen ehr Texten vörtodregen. Ahn de Stütt vun’t Ministerium för Billen, Wetenschop un Kultur vun dat Land Sleswig-Holsteen, de dat ZfN föddert, weer dat nich mööglich west, düssen Dag op de Been to stellen.
Foto: Marie Sophie Koop
Irmi Dreiskämper is een von de Autoren, de sik för de korten Lesens anmellt hebbt
Ok wenn de Naam „Nedderdüütsche Autorendrepen“ dorop wiest, dat dat Drepen blots exklusiv för Autoren is, is dat nich so. Denn wat sünd de Autoren ahn Publikum? Bummelig 40 Besöker sünd för den Optakt na Mölln kamen, bavento noch 19 utwählte Autoren, de ehr Texten later vörleest hebbt. Klaus Schlie, Präsident vun de Stiften Hertogdom Loonborg, un Marie Sophie Koop, Leidersche vun’t ZfN Holsteen, hebbt all in’n Festsaal vun’t Herrenhuus begrööt. Achterna stünn en Podiumsdiskuschoon ünner den Titel „De Tokumst vun’t Book – nedderdüütsche Literatur twüschen Niesch, Ünnergang un ne’e Relevanz“ op’t Programm. Över dat Thema hebbt Martha-Luise Lessing, Verleggersche bi verlagmarless.de, Heiko Thomsen, Autor un Jürgen Kropp, Autor diskereert. Na den Tallen vun Böker, de in de Virtuellen nedderdüütschen Bibliothek (vnb) oplist sünd, kaamt elk en Johr jümmers weniger Böker rut. Mit Drift is över Thesen as „Ahn tweesprakige Böker hett dat Nedderdüütsche keen Tokumst.“ oder „De Politik mutt mehr Subventschonen för de nedderdüütsche Literatur praatstellen, üm Veraptentlichens to föddern.“ diskereert worrn. All weren sik an’t Enn enig, dat de nedderdüütsche Literatur aktuell en Niesch is un vör den Ünnergang bewohrt warrn mutt. Dorbi is dat wichtig, plattdüütschen Nawass to genereren.
Foto: Marie Sophie Koop
Silvia Weber stellt de schüchterne Trulla vör
Denn weer dat sowiet un för de Autoren start op twee Rüüm verdeelt de Lesens. Humorvulle bet hen to nadenkerne Texten weren to hören. Ulrich Gröhn un Ekhard Ninnemann harrn bavento noch je een Leed sungen. Silvia Weber, de to’n eersten Mal bi’t Drepen dorbi weer, harr nich blots ehr Geschicht mitbröcht, sünnern ok noch de Snick Trulla, en Handpopp. Mit ehr geiht se to’n Bispeel in Kitas oder Scholen. Un Trulla snackt natürlich Platt!
Foto: Marie Sophie Koop
Jürgen Kropp leest Geschichten ut sien Book „Ut de Kehr
Namiddaags geev dat ok noch en längere Lesen vun Jürgen Kropp. In de Diskuschoonsrunn harr he al vertellt, dat he egentlich gor keen Lesens mehr maakt. He hett slechte Beleevnissen mit Besöker bi sien Lesens maakt, de füünsch mit em weren, wiel he keen Döntjes leest, sünnern Texten mit Deepgang. För dat ZfN harr he en Utnahm maakt un is dorför un för sien Texten mit veel Bifall belohnt worrn.
To’n Sluss speel NORMA un ehr Band en Kunzert. Mit en freesch Leed över ehr Heimat Föhr hett se all den noordfreeschen Dialekt Fering neger bröcht. Mit ehr plattdüütschen Leedtexten hett se de See, Fründschop un de Leevde in den Festsaal rinspöölt. An’t Enn hett dat Publikum ehren Song „Op bald“ mitsungen. Wat för en passlichen Titel, neem dat Nedderdüütsche Autorendrepen ok tokamen Johr wedder stattfinnen schall.
„Ik wöör mi freien, wenn denn noch mehr Lüüd to‘t Nedderdüütsche Autorendrepen na Mölln kaamt. Dorto will ik ok jedeen Moot maken, sik för dat Nedderdüütsche Autorendrepen to bewarven. Du muttst keen Book oder Geschicht rutbröcht hebben, üm hier lesen to dörven.“, so Leidersche Marie Sophie Koop. „De Autoren köönt sik ünnerenanner vernetten, Besöker mit de Autoren in’t Snacken kamen. Neem hett een dorför sünst en Mööglichkeit?“ Dat neegste Autorendrepen is för den 9. Mai 2026 plaant.
Düssen Artikel kann een ok in’t Klaus-Groth-Jahrbuch 2025 nalesen.
