„PLATT FÖR HÜÜT UN MORGEN“, NEDDERDÜÜTSCH AUTORENDREPEN 2023
Niels Tümmler
Middageten mit Insicht
(een Muus ünnern Kökendisch)
Se: Rögen, rögen, de heele Dag rögen
Jümmer daan, nix to högen
De Welt geht in´n Dutt
Allens kaputt
Dierten, de störn
Kriggt twüschen de Hörn
Man ok de för´t Eten
Freeten, freeten, de heele Dag freeten
Un bi´t Kaun un Bieten
Höör eens to, Mann – luuster de Naricht
Dor sünd se an Scheeten
Lüüd op de Flucht, de armen Seelen
He: Dat Fleesch is wat toog
Ja, meenst nich ok? – Grote Soorg
De freten us de Hoor vun Kopp!
Ja, ne, dor mutt noch wat Peper op!
Ja, hest recht, leeg is dat
Nee, dat Fleesch, ik meen us Eten
Watt heff ik? – Schlecht Geweten?
Nee, worüm, mi geiht heel goot
So, hm, dörtig Lüüd sünd doot!?
Bi een Anslag mit Bomb un Mess?
Hest höört – Appeln ward dürer, dat is een Mess!
Se hebbt doch jüst dat Fleesch verdüert
Wi mütt bald hungern, de sünd doch beschüert!
Ik bruuk elke Dag mien Karbonaa, mien Braten
De Dokter meen al, dat is toveel!
Is leeg, ik weet, dat mit de Lüüd
Us holt de Wulf de Schaap, lett blots de Küüt
Dor mütt se wat daan
Anners ward us Land noch ünnergahn!
Ja, ik weet – Minschen versupen
Giv noch´n Slag Bohnen
Kannst fien na pupen!
Nee, wat wüllt se ok hier
Ja, oh, hmmm – de Karbonaa, de is aver ok schier
Hest seehn, de Plakaten vun de Blauen
Dee seggt de Wohrheit, dee stooht op!
Dee an de Macht, de hebbt dat Rezept
Denn mutt keeneen mehr jammern, denn wi hebbt
Düütschland bald wedder för us
Mit dat Rattenpack is denn bald Sluss!
Wat seggst!? – Kantüffeln? Ja, giv noch een paar
Dat Wedder to natt, givt wenig düt Jaahr!
Nee, ach nee, wi hebbt dat ni licht
De Welt vull Verbrekers, so geiht dat doch nich!
De Geelen, hest seehn, de wüllt de Staat nu as de Verbrekers organiseern
Sall woll heten, se lött sik noch mehr smeern!
De sünd doch all korrupt un nicht o gebruken
De süllt se man glieks mit versupen
De Swatten, de Roten, de Kommunisten
De Grönen wöör ik ok ni missen!
Naspies? – Rote Grütt? – Man her, ja , mit Slag
Anners fall ik vun Fleesch, de Dag
Un, mien Sööte, dat wüllt wi ja nich
Ja, mien Tabletten, ik weet Fruu, de för tegen de Gicht
Nee, dat glööv man, dat ward allerbest
Denn is dat vörbi mit dat Smarotzerfest
Dee verstaaht us, de Blauen, de weet, wat wi wüllt
So, nu aver loos, ik mutt noch to Amt
Ja, ik weet, ward vandag Jobcenter nannt
Ok so beschüert, maakt mi heel vergretzt
Föhl mi in mien Ehr verletzt
Droht mit Sparrn vun dat beten Stütt
DEE – DROHT MI – stell di blots vör
Sall Wark annehmen veel to swöör
As Hölpsmann, de hebbt doch een Vagel
Dat wöör to mien Kist de letzte Nagel
WAT!? – De Blauen wüllt för Fuhle Arbeitslager!?
Nee, würkli, dat will ik denn ok nich un ni!
Denn, mien Sööte, denn nehm ik de Wark wohl an, meenst ni!?
Und wi wählt doch beter de Demokratie!
