för de Lütten

Benita Brunnert

Philipp un sien Rookengel

Philipp un sien Rookengel

Plattdüütsch Brandschuulbillen för Kinner

Woans geiht een richtig mit Füer un Rook üm? Un wat mutt een doon, wenn’t brennen deit? Dat lehrt dat lütt Heft „Philipp un sien Rookengel“. Dat kindgerecht opmaakt Book richt sik an Kinner in Kitas un Grundscholen un verbinnt Brandschuulbillen mit Spraakfördern.

En Geschicht, de hangen blifft

In de Geschicht lett de lütte Philipp bi sien Geburtsdagsfier en Reetsteken fallen. Op eenmaal fangt de Dischdeek an to brennen. To’t Glück is sien Mama glieks to Stell un kann dat Füer utmaken. Philipp lehrt, dat dat Rookmellers gifft, de bi Gefohren Alarm slaat un Leven redden köönt. He nöömt jem „Rookengels“. De Familje warrt ok wies, dat Rookmellers vun’t Gesett vörschreven sünd un schafft sik ok glieks welk an.

Mit korte Texten un feine Biller verklaart dat Book:

· woans gefährlich Füer un Rook sünd

· wat Kinner in’n Nootfall doon mööt

· dat luut Hölp ropen wichtig is

· un dat de 112 de Nummer för den Nootfall is

Brandschuul op Platt – en starke Kombinatschoon

Dat Heft is Deel vun en lannswiede Akschoon in Sleswig-Holsteen. Mit Föddergeller vun dat Binnenministerium un dat Ministerium för Billen (je rund 10.000 Euro) hebbt se 75.000 Heften druckt. Övergeven worrn se an den Lannsfüerwehrverband Sleswig-Holsteen, stellvertretend an de Grundschool Eidertal in Molfsee un an dat Zentrum för Nedderdüütsch in Leck.

Dat Maal: Kinner so fröh as dat man geiht stark maken – för ehr Sekerheit un för jemehrn Togang to dat Plattdüütsche.

Lütt Book – grote Warken

„Philipp un sien Rookengel“ is lütt as en Pixi-Book, leeftallig illustreert un nah an de Levenswelt vun de Kinner schreven.

Wo kriggt een de Heften?

De Heften warrt över de Füerwehren för de Brandschuulbillen in Kitas un Grundscholen verdeelt. Wokeen dor Interess an hett oder hölpen will, dat dat ünner de Lüüd kümmt, de kann sik an sien örtlich Füerwehr wennen oder sik bi dat Zentrum för Nedderdüütsch in Leck mellen.