för de Groten
Plattdüütsch Seminoren bi’t Noordkolleg Rendsborg
Twüschen Noord-Oostsee-Kanal un Eider sitt dat Noordkolleg Rendsborg, en Akademie för kulturelle Billen, Huus för Dagfohrten mit Hotelbedrief un Sitt vun velen Verenen un Institutschonen. Dat Noordkolleg Rendsborg büddt ünnerscheedlich Seminoren an, to’n Bispeel Schrievwarksteden oder Spraakkursen. Ok de plattdüütsche Spraak is Deel vun de Seminoranbotten vun’t Noordkolleg Rendsborg.
Snupperkurs Plattdüütsch
Plattdüütsch hören, verstahn un ok sülvst snacken, dat is dat Teel vun’n „Snupperkurs Plattdüütsch“. De Kurs schall en Instieg in de plattdüütsche Spraak beden. De eersten Wöör un Snackwiesen warrt wies warrn, lütte Konversatschonen föhrt – allens ahn Arbeitsdruck. De Freid steiht in’n Vörgrund. Bavento warrt de kulturelle Achtergrund un de besünnere Klang un Rhythmus vun’t Plattdüüütsche vermiddelt.
De Kurs richt sik an Lüüd, de Plattdüütsch kennenlehren wüllt oder villicht ok al in ehr Kinnertiet Plattdüütsch höört hebbt. Plattdüütschkenntnissen warrt nich vörutsett.
Nedderdüütsch kompakt – Plattdüütsch kort un knapp
Is dat mööglich, binnen een Dag Plattdüütsch to lehren? – Natürlich nich! Aver een kann en lütt beten in de Spraak indükern. Af un an stellt een denn fast, dat Plattdüütsch doch nich so frömd is un een de Spraak goot verstahn kann. Un wenn de Spraak eerstmal verstahn warrt, is dat nich mehr so swoor ok in’t Snacken to kamen. In düssen Kurs billt dat aktive Snacken un Navertellen den Swoorpunkt. Ok warrt passliche Literatur för Anfängers vörstellt. De Kurs is dorbi op den Bruuk vun’t Plattdüütsche in’n Alldag utleggt: De Deelnehmers befaat sik mit de Themenfeller Inköpen, Sport maken, op Reisen gahn un to Huus bi de Familie. Of Arbeit mit korten Sketchen, Spelen oder Lesen, bi all Övens steiht de plattdüütsche Spraak un Freid in’n Vörgrund.
Plattdüütsch praktisch in de Pleeg
Plattdüütsch is hüüt ut de Pleeg in’n Noorden nich wegtodenken. Vele Lüüd, de hüüttodaags pleegt warrt, sünd mit Plattdüütsch as Mudderspraak opwussen. Düssen Lüüd denn in se ehr Mudderspraak to begegen hölpt, dat se ehr Wünsch beter utdrücken köönt. Ok bi Lüüd mit Demenz is de Insatz vun’t Plattdüütsche vun Vördeel. Verwandte oder Pleegpersonal hebbt oftins keen Plattdüütschkenntnissen. Mit Scholens kann dor gegenstüert warrn.
„Plattdüütsch praktsch in de Pleeg“ is Deel vun de Seminarreeg „Nedderdüütsch för den Pleegberiek“. Deelnehmers lehrt wichtig Wöör un Snackwiesen, de in’n Ümgang mit plattsnackene Personen wichtig sünd. De Swoorpunkt liggt in’n Kurs op de praktische Anwennen vun’t Plattdüütsche. Över Alldagssitutatschonen in de Pleeg, de Ümgang mit Demenzpatschenten un öllere Lüüd warrt snackt, lütte Spelen un Leder lehrt.
Terminen för de Kursen sünd op de Nettsiet vun’t Noordkolleg to finnen.