Geesthacht – Ünner Bifall geiht de rode Theatervörhang op. De söss Fruens, de hier op de Böhn Szenen präsenteert, staht deelwies to’n eersten Mal op de Theaterböhn oder snackt hüüt ok to’n eersten Mal Plattdüütsch. Gemeensam hebbt se, dat se de Deelnehmerschen vun de eerste Schauspeelwarksteed „Schauspielen – op Platt?!“ sünd. Tohoop mit de Nedderdüütsche Volksböhn Geesthacht hett dat Zentrum för Nedderdüütsch in Holsteen för dat Kulturfestival „KulturSommer am Kanal“ düssen Dag utricht. Exklusiv hebbt de Deelnehmerschen eerstmal en Rundleid dörch de Theaterwakrsteed, in de de Nedderdüütsche Volksböhn Geestacht proovt, kregen. Ünnerscheedliche Requisiten – vun’n Buddelschipp bet hen to en Holttrepp – hebbt se wiest kregen un natürlich ok mal sehn, wat de Kostümfundus so hergifft. Achteran sünd denn Teams mit je twee Lüüd tosamenstellt worrn un en Regisseur oder Regisseurin vun de Nedderdüütsche Volksböhn Geesthacht hett de denn in de Szenenarbeit stüert.
Toeerst is an de Utspraak arbeidt worrn, denn is dat Speel dorto kamen. Na en lütte Middagspaus mit Hotdogs sünd denn ok Requisiten mit in’t Speel inbunnen worrn. Un denn weer dat sowiet. All dree Gruppen hebbt sik ehr Szenen, de se in de verleden dree Stünnen utarbeidt hebbt, präsenteert. Mit veel Insatz un Speelfreid hebbt se de humorvullen Szenen op de Böhn bröcht un so de anner Deelnehmerschen un dat Team vun de Nedderdüütsche Volksböhn to’t Lachen bröcht. De Resonanz vun de Deelnehmerschen weer positiv: se wünscht sik, dat dat Anbott wedderhaalt warrt. Un för uns weer dat natürlich wunnerbor to sehn, wo gau de Grupp tosamenwussen is un dat Interess an Plattdüütsch grötter worrn is.
