för de Groten
Benita Brunnert
“Platt mit Beo”
Oostneddderdüütsche Variant
Platt lehren – modern, licht un överall
De Spraaklehr-App „Platt mit Beo“
„En Spraak starvt ut, wenn ehr nüms mehr snacken deit.“ Jüst dor sett de Spraaklehr-App „Platt mit Beo“ an. Se wiest, dat Nedderdüütsch ok vundaag noch lebennig, modern un licht to lehren is. Entwickelt wöör de App vun’t Kumpetenzzentrum för Nedderdüütschdidaktik an de Universität Griepswoold tohopen mit anner noorddüütsche Landschopverbänn. Se wüllt dormit Lust maken, Plattdüütsch nee oder wedder to entdecken.
Lehren mit Beo – Pedd bi Pedd
Dörch de App föhrt Beo, en fründlichen, vun’t Utstarven bedrohten Vagel mit Talent för Spraken. He begleit de Lehrnden dörch teihn Lexen, neem se de wichtigsten Wöör un Sätz över Saken as Begröten, Familje, Eten un Drinken oder för Alldagssituatschonen öövt.
Dorbi sett de App op:
- speelsch Lehren mit Fragen, Dialogen un Lückentexten
- en klare Progression vun de Grundlagen bet hen to Themen de al en beten mehr Anspröök hebbt
- Alldagsspraak mit typische Utdrück un Redewennen
- flexibel Lehren: een kann jeedeen Tiet losleggen, de App offline bruken un dat Tempo sülvst fastleggen
Twee Platt-Varianten, een Maal
Glieks to’n Anfang köönt de Lernenden utsöken, wat för en Platt se lehren möcht:
Oostnedderdüütsch oder Westnedderdüütsch. De App nimmt regionale Besünnerheiten ut Mekelborg-Vörpommern, Neddersassen, Hamborg, Bremen un Sleswig-Holsteen mit op. Allens in allen warrt över 3.500 Wöör un üm un bi 4.200 Audioopnahmen vermiddelt.
Hören, lesen, snacken un schrieven
„Platt mit Beo“ fördert all wichtige Spraakfardigkeiten:
- Lees- un Höörverstahn
- Schrieven un Utspraak
- plattdüütsche Rechtschrieven
- een kann utsöken, wat een na de Orthografie na Johannes Sass oder de Orthografie na Renate Herrmann-Winter lehren much. De Audioopnahmen sünd mit Stütt vun den NDR professionell inspeelt worrn: För dat westnedderdüütsche Platt hett de Schauspelersch Sandra Keck, för dat oostnedderdüütsche Thomas Naedler den Vagel Beo de Stimm geven.
Mehr as bloots Wöör lehren
In de App geiht dat nich üm mööglichst vele Wöör, man üm Wedderhalen un Vertiefen. Dorüm gifft dat:
- verständliche Verklarens to de plattdüütsche Grammatik
- en Vokabel-Markfunkschoon
- Achtergrundweten to Spraakgeschicht un Literatur
- en Weten-Deel rund üm Plattdüütsch in Medien un Kultur
- speelsche Extra-Anbotten
Gratis, offline un för all dor
Na dat Daalladen kann de App ok ganz ahn Internet bruukt warrn – Platt lehren geiht also överall. „Platt mit Beo“ richt sik sünnerlich an Jugendliche un wussen Lüüd, man ok an all de Minschen, de in’n Noorden ankaamt, regionale Identität verstaht oder jemehr Plattkenntnissen wedder opfrischen wüllt.
De App is kostenfree un överall dor, neem ji Apps finnen köönt.
Wiedere Informatschonen:
Nettsiet vun de Universität Griepswoold