Dat weer en echte Mammut-Programm, wat dat in Mölln an’n 09. Juli geven dee. Loosgahn is dat mit dat Lesen vun plattdüütsche Schriverslüüd ut den ganzen Noorden. Wat dat dorbi an Themen to hören geev, weer gewaltig. Fruunsrechten, Ümweltschutz, Leevde un Dood weren vertreden. Ok Gedichten kemen to’n Vördrag. 13 Schrieverslüüd ut alle Ecken vun Noorddüütschland weren mit vun de Partie. Ok heel bewegen Texten över Krieg un Fucht weren dorbi. De Schrieverslüüd hebbt sik sodennig as bannig aktuell wiest.
Denn geev dat Middageten un en Kaffepaus, wo sik de Lüüd, de sik mehrstensdeels över dat Johr kuum sehn hebbt, de Gelegenheit harrn un tuschen sik ut.
Af Klock dree güng dat denn mit der Tüdelband wieder. Dat Hamburger Platt-Pop-Duo hett op de Wisch an’n See speelt, wieldes de Besökers ünner de Appelbööm seten hebbt to Tolustern.
En schöne Programm mit en Reeg Leders vun ehr ni’e CD geev dat to hören.
Klock fief güng dat Programm vun den Autorendag to Enn. Man plattdüütsch Programm noch lang nich. Blots en lütte Paus merrn mang. Klock söven harrn wi denn de Gelegenheit un kieken in de Theatersaal vun’t Ausgustinum Mölln de Opföhren vun Otto – Othello op Platt. En Hamborger Schauspeeltruppe hett dat wunnerbor op de Bühne bröcht. Kött, inszeneert un op Platt överdrägen hett düsse Version vun’t Shakespeare sien Wark. de in de Wersermasch spelen deit, de junge Regisseur Kilian Prigge ut Worpsweed. Duert hett dat denn man blots 50 Minuten. Man liekers weer dat spannend, dramatisch un twüschentiets ok mal bannig witzig.
